Foto: Qorǵanys ministrligi
Radioelektronika jáne bailanys áskeri-injenerlik institýty tórt jyldyq bilim berý baǵdarlamasyna tolyqtai kóshti, dep habarlaidy "Ult aqparat" inbusiness.kz-ke silteme jasap.
Institýt bastyǵy general-maior Qairat Daýtov jańa tórt jyldyq oqý baǵdarlamasy oqý materialyn shoǵyrlandyrýǵa jáne daiyndyq qarqyndylyǵyn arttyrýǵa múmkindik beretinine toqtaldy.
– Tórt jyldyq oqý merzimine kóshý institýtqa osy ýaqyt ishinde bakalavr dárejesin alýdy kózdeitin halyqaralyq bilim berý standarttaryna sáikes kelýge múmkindik beredi. Mundai sheshim joǵary bilikti mamandardy daiyndaý protsesin jedeldetip qana qoimai, ony ikemdi ári beiimdi etedi, – dep atap ótti ol.
Biyl institýt eki jańa mamandyq engizip otyr. Sonyń biri "Jýrnalistika jáne áskeri istegi qoǵammen bailanys" mamandyǵy Qarýly kúshterdiń qyzmetin saýatty ári tiimdi jariialai alatyn mamandardy daiarlaýdy kózdeidi. Tsifrlyq tehnologiialar men aqparattyq soǵys dáýirinde áskeri jýrnalistiń róli barǵan saiyn mańyzdy bola bastady. Bul mamandyqtyń kýrsanttary sapaly kontent qurý, qoǵamdyq pikirdi qalyptastyrý jáne zamanaýi mediamen jumys isteý ádisterin úirenip shyǵady.
"Áskeri iste dirijerlyq etý" mamandyǵyna oqýǵa túskender joǵary kásibi deńgeide túrli is-sharalardy, sherýler men rásimderdi mýzykalyq súiemeldeýdi júzege asyratyn áskeri orkestrlerdi basqarýdy úirenedi. Bul mamandyq kýrsanttarǵa áskeri ortada shyǵarmashylyq jaǵynan da, ózin-ózi damytý jaǵynan da jańa múmkindikter ashady.
Túlekter tańdaǵan mamandyǵyna qarai áskeri institýt pen seriktes joǵary oqý oryndary – Ál-Farabi atyndaǵy Qazaq ulttyq ýniversitetin nemese Qurmanǵazy atyndaǵy Qazaq ulttyq konservatoriiasyn bitirgeni týraly eki diplom alyp shyǵady.
Jańa mamandyqtarǵa oqýǵa túsýge niet bildirgen talapkerler úshin 2024 jylǵy 20 maýsymnan 7 shildege deiin shyǵarmashylyq emtihandarǵa tirkelý júrgiziledi. Ol 8-15 shilde aralyǵynda ótedi. Shyǵarmashylyq emtihandar eń talantty ári yntaly úmitkerlerdi anyqtaityn mańyzdy irikteý kezeńi bolmaq.
