Almatydaǵy 3650 áskeri bóliminde ózin atyp alǵan sarbazǵa eshqandai moraldyq ári fizikalyq qysym kórsetilmegen. Sarbaz ólimi áskeri qyzmetti atqarýmen bailanysty emes.
Bul týraly Ulttyq ulannyń «Ońtústik» óńirlik qolbasshylyǵy qolbasshysynyń tárbie jáne áleýmetik-quqyqtyq jumystar jónindegi orynbasary polkovnik Niiaztai Álkeshev málimdedi, dep habarlaidy QazAqparat agenttigi.
Polkovnik Niiaztai Álkeshevtiń aitýynsha, shart boiynsha áskeri qyzmetker qatardaǵy jaýynger Abylai Sabyrov 22 tamyzda asa mańyzdy memlekettik nysandy kúzetken.
«Qatardaǵy jaýynger Sabyrov ol kúni rezervte turǵan. Iaǵni, postta bolmaǵan. Saǵat túski 14:00 shamasynda 5-shi postta turǵan qarýlas dosyn aýystyrady. Ol jerde Abylai qarýlasy túski asyn iship kelip, ony aýystyrǵanǵa deiin turýy kerek boldy. Ókinishke orai, osy ýaqyt ishinde, iaǵni, bir saǵat ýaqyt aralyǵynda qaiǵyly jaǵdai boldy.
Men tolyq jaýapkershilikpen aitamyn, oǵan eshqandai moraldyq ári fizikalyq qysym kórsetilgen joq. Tipti, onymen birge qaraýylǵa týǵan jezdesi tústi», - dedi Ulttyq ulan polkovnigi.
Jalpy, áskeri qyzmetker Almaty qalasynda týǵan apaiymen bir páterde turyp kelgen.
«Abylai jasy 21-de, boidaq. Otbasynda tórt balanyń tuńǵyshy. Ata-anasy Jetisý oblysy, Tekeli qalasynda turady.
Sarbaz Ulttyq ulannyń Batys óńirlik qolbasshylyǵynda merzimdi áskeri boryshyn ótegen. Ótken jyldyń 17 maýsymynda zapasqa shyǵyp, bizge shartty qyzmetker retinde 5 qazanda jumysqa kirdi.
Abylai Sabyrov áskeri qyzmette ózin jaqsy jaǵynan kórsetti. Onyń qujattary jaqynda Joǵary bas qolbasshylyqqa jiberilip, ary qarai joǵary laýazymǵa taǵaiyndalýy kerek bolatyn. Óz ózine qol jumsaýyna bailanysty onyń bári toqtatyldy», - polkovnik.
Sondai-aq Niiaztai Álkeshev qazirgi tergeý is-sharalarynyń qorytyndysy boiynsha sarbaz ólimi eger ózine qol jumsaýǵa deiin jetkizý nemese áskeri qyzmetti ótkerýmen bailanysty bolǵany anyqtalsa, onyń otbasyna zańnamaǵa sáikes ótemaqy tólenetinin, al eger rasymen sýitsid jasaǵany anyqtalsa, onda ol basqa másele bolmaq ekenin jetkizdi.
Sóz sońynda polkovnik Niiaztai Álkeshev marqum Abylai Sabyrovtyń ata-anasy men týǵan týystaryna kóńil aitty.
Aita keteiik, Abylai Sabyrovtyń denesin jerleýge ata-anasy búgin Tekeli qalasyna alyp ketti. Sondai-aq, olar áskeri bólim men Ulttyq ulanǵa eshqandai aryz-shaǵym bildirgen joq.
