Internatta tárbielengen burynǵy áskeri qyzmetshi Madiiar áskeri boryshyn óteý kezinde soqqyǵa jyǵylyp, aýyr jaraqat alǵanyn málimdedi. Qazir jas jigit baspanasyz ári qarajatsyz qalǵan, dep habarlaidy ult.kz.
Onyń oqiǵasyn qoǵam belsendisi Gúlmira Abyqai jariialady.
Aitýynsha, Madiiar áskerge deiin kólik jýatyn jerde jumys istep, sol jerde turǵan. 2025 jyldyń mamyrynda áskerge shaqyrylyp, Semeidegi Tótenshe jaǵdailar ministrliginiń 68303 áskeri bólimine jiberilgen.
Madiiardyń sózinshe, 6 shildede ofitser onyń basynan urǵan. Keiin ony basqa áskeri qyzmetshi de uryp-soqqan. Sonyń saldarynan jas jigit eki apta komada jatyp, shamamen eki ai aýrýhanada emdelgen.
Qoǵam belsendisiniń aitýynsha, birneshe aidan keiin ofitser Madiiardan eshkimge shaǵymy joq ekeni týraly qolhat jazýdy suraǵan. Keiin oǵan 100 myń teńge berip, Almatyǵa jibergen.
Qazir burynǵy sarbazdyń densaýlyǵynda kúrdeli máseleler bar. Tamaq aimaǵyna tútik ornatylǵan, ol sóilei almaidy jáne ota jasatýy qajet. Jaqynda Madiiar baspanasyz qalyp, úsh kún boiy tamaqsyz júrgen.
Oǵan kómek usynǵandarǵa jas jigit eń aldymen ózin uryp-soqqandardyń jaýapqa tartylǵanyn qalaitynyn aitqan.
«Maǵan kómek kerek emes. Men tek áskeri bólimdegi kinálilerdiń jazalanǵanyn qalaimyn», – dep jazdy Madiiar.
Qazir ol ýaqytsha qaýipsiz jerge ornalastyrylǵan.
