Qorǵanys ministrligi sarbazdar arasynda óz-ózine qol jumsaý oqiǵalarynyń jiilep ketýine bailanysty resmi málimdeme jasady, dep habarlaidy "Ult aqparat".
Vedomstvo sýitsid faktileri tek Qarýly kúshterde ǵana emes, basqa da ásker túrlerinde bolyp jatqanyn atap ótti.
"Baǵynystylardyń ómiri men densaýlyǵyna UQK Shekara qyzmeti, IIM Ulttyq ulany, Memlekettik kúzet qyzmeti jáne Tótenshe jaǵdailar ministrligi de jaýapty. Bul kúshtik qurylymdar beibit ýaqytta Qarýly kúshter quramyna kirmeidi jáne Qorǵanys ministrligi olardyń qaýipsizdigin baqylamaidy.
Óz-ózine qol jumsaý siiaqty sharasyz qadamǵa barý - ol adamnyń týystary men jaqyndary úshin úlken qaiǵy. Komandirlerge de jaýyngerden aiyrylý aýyr shyǵyn. Qarýly kúshterde bolǵan árbir jaǵdaidy áskeri politsiia qyzmetkerleri jáne basqa da qylmystyq qýdalaý organdary muqiiat tekseredi" - dep túsindirdi ministrlik.
Vedomstvo málimetinshe, tekserý nátijeleri óz-ózine qol jumsaý kóp jaǵdaida áskeri qyzmet ótkerýmen bailanysty emes ekenin kórsetken.
"Áskerge shaqyrýǵa deiingi kezeńde áskeri qyzmetshilerdi osyndai áreketke itermeleitin ártúrli ómirlik jaǵdailar kezdesetinin eskerý kerek.
Qazirgi ýaqytta Qorǵanys ministrliginiń bastamasymen ǵylym, quqyq qorǵaý organdary men úkimettik emes uiymdar ókilderiniń qatysýymen áskeri ortada orny tolmas shyǵyndardy barynsha azaitýǵa jáne sýitsidtiń aldyn alýǵa baǵyttalǵan «Ómirdi saqta» keshendi baǵdarlamasy ázirlenip jatyr.
Elimizdiń kúshtik qurylymdarynyń qyzmeti týraly tolyǵyraq osy vedomstvolardyń resmi saittarynan tanysa alasyzdar" - deidi ministrliktiń baspasóz qyzmeti.
Eske sala keteiik, 21 tamyzda Jambyl oblysynda shekara qyzmetiniń 18 jastaǵy sarbazy Bekbol Mirash qaza bolǵany habarlandy. Buǵan deiin áleýmettik jelide Bekboldyń óz-ózine qol salǵany týraly aqparat taraǵan.
Munyń aldynda Jambyl oblysyndaǵy 30212 áskeri bólimde merzimdi áskeri qyzmetke shaqyrylǵan Álibek Qalbai tórt kúnnen keiin qaitys bolǵan edi. 18 jastaǵy sarbaz Mańǵystaý óńirinen shaqyrylǵan.
Al kúni keshe Atyraý oblysyndaǵy memlekettik shekara ýchaskeleriniń birinde kezekshilik atqarý kezinde merzimdi áskeri qyzmetshi Nurbek Erǵaliev kóz jumdy.
