QR Qorǵanys ministrligi áskerdegi ólim-jitimdi boldyrmaý men tárbie jumysy júiesin jetildirýge baǵyttalǵan «Ómirdi saqta» atty vedomstvoaralyq baǵdarlama daiyndaýdy qolǵa aldy. Bul týraly atalǵan vedomstvonyń QazAqparat tilshisi saýalyna berilgen jaýapta aitylǵan.
«Áskerdegi ólim-jitimdi azaitý maqsatynda kúndelikti nusqaýlyqtar, qaýipsizdik sharalary boiynsha sabaqtar, tárbielik jáne áleýmettik is-sharalar uiymdastyrylady. Sonymen qatar sarbazdar arasynda jeke jáne jasyryn saýalnamalar júrgiziledi. Odan bólek quqyq buzýshylyqtardyń aldyn alý maqsatynda jeke qurammen jumys isteýdiń zaman talabyna sai ádisteri qoldanylady. Onyń ishinde syni turǵydan oilaý tehnologiiasy men keis-stadi ádisi bar. Ol jerde qateler men olqylyqtar boiynsha naqty mysaldar keltirilip, qaralady», - degen jaýap keldi ministrlikten.
Sonymen qatar ministrliktiń málimetinshe áskeri bólimderde ashyq esik kúni, suraq-jaýap keshi, prokýror saǵaty jáne kóshpeli sot sharasy uiymdastyrylady.
«Jas sarbazdarǵa áskeri tárbie berýde qoǵamdyq uiymdar jáne institýttarmen birlesip atqarǵan jumystyń mańyzy erekshe. Sarbazdardyń ata-analary, bólimshe komandirleri men tárbie qurylymy ofitserleriniń qatysýymen arnaiy chattar jumys isteidi. Sol siiaqty áskeri mindetin óteýshilerdiń apta saiyn ata-analarymen telefon arqyly sóilesý múmkindigi bar», - deidi vedomstvodan.
Odan bólek, Qorǵanys ministrligi áskerdegi ólim-jitimdi boldyrmaý men tárbie jumysy júiesin jetildirýge baǵyttalǵan «Ómirdi saqta» atty vedomstvoaralyq baǵdarlama daiyndaý boiynsha jumystyń bastalǵanyn habarlap otyr.
«Atalǵan baǵdarlama uzaqmerzimdi perspektivany kózdeidi. Baǵdarlama áskeri ortada ólim-jitimniń aldyn alýdyń maqsattary men mindetteri, erejeleri men negizgi baǵyttaryn aiqyndaityn strategiialyq qujat. Bul qujat áskeri qyzmettiń ereksheligi men jai-kúiin eskere otyryp, oǵan sáikes keletin vedomstvolyq is-sharalar josparyn ázirleýge negiz bolady», - delingen habarlamada.
Resmi saýal jaýabynda aitylǵandai sarbazdardyń qaýipsizdigin qamtamasyz etý úshin «Piramida», «Jaýyngerlik dos» jáne «Naparnik» baǵdarlamasy qoldanylady.
Sondai-aq, kazarmalarda beinebaqylaý kameralary men senim telefony jumys istep tur.
«Kún saiyn áskeri politseiler jáne bólimniń meditsina qyzmetkerleriniń qatysýymen sarbazdardy qarap-tekserý júrgiziledi», - dep tolyqtyrdy ministrlikten.
