QR Premer-Ministri Asqar Mamin Abý-Dabi qalasyna jumys sapary aiasynda Birikken Arab Ámirlikteriniń vitse-prezidenti jáne Premer-Ministri, Dýbai ámiri Muhammed ibn Rashid ál Maktýmmen jáne BAÁ Premer-Ministriniń orynbasary, Prezident isteri jónindegi ministri sheih Mansur ben Zaid ál Nahaianmen kelissóz júrgizdi. Bul týraly Úkimettiń baspasóz qyzmeti habarlady.
Taraptar osyǵan deiin qol jetkizilgen ýaǵdalastyqtardy iske asyrý barysyn jáne saýda-ekonomikalyq, qarjy-investitsiialyq, kólik-logistika, agroónerkásip, týrizm, ǵarysh, taý-ken metallýrgiiasy, energetika jáne basqa da salalardaǵy ekijaqty yntymaqtastyq perspektivalaryn talqylady.
Sondai-aq Úkimet basshysy BAÁ biznes kapitandarymen — «Mubadala» memlekettik holdinginiń, «Aldar Properties», «ADQ», «Al Dahra Holding», «International Holdings Company» («Royal Group») kompaniialarynyń basshylyǵymen kezdesti. Kelissózder qorytyndysy boiynsha QR men BAÁ arasynda qus fabrikalary men sút-taýar fermalaryn salý, jemister men sańyraýqulaqtardy óndirý jáne óńdeý, TMK jáne geologiialyq barlaý salalaryndaǵy yntymaqtastyq, Ekibastuz qalasynyń ónerkásiptik aimaǵynda Indýstriialyq park qurý, Shyǵys Qazaqstan oblysynda «Qatonqaraǵai» týristik keshenin qurý, sondai-aq Qazaqstanda elektromobilder komponentteri óndirisin ashý boiynsha birlesken jobalardy iske asyrý jóninde 17 úkimetaralyq jáne kommertsiialyq kelisimge qol qoiyldy.
BAÁ Qaraǵandy oblysynda sýmen jabdyqtaý jáne sý burý boiynsha jobalardy iske asyrýǵa qatysady, bul jobalar ozyq tehnologiialardy berýdi jáne keiinnen Qazaqstanda óndiristi jergiliktendirýdi kózdeidi. AÓK jobalaryn qarjylandyrý úshin Qazaqstan men BAÁ jalpy kapitaly $100 mln bolatyn birlesken qor qurýǵa nietti. AHQO alańynda «E-Banking» salasyndaǵy yntymaqtastyq damityn bolady.
Kórsetilgen jobalar boiynsha QR ekonomikasyna investitsiialardyń jalpy somasy shamamen $2,2 mlrd quraidy. Investitsiialyq jobalar qosylǵan quny men rentabeldiligi joǵary, sondai-aq ishki jáne perspektivaly syrtqy naryqtarda suranystyń úlken áleýeti bar jańa óndiristerdi qurýdy kózdeidi. Olardy iske asyrý Qazaqstanda jańa sapaly jumys oryndaryn qurýǵa, ozyq tehnologiialar men is-tájiribeni engizýge múmkindik beredi.
Eki el arasyndaǵy áýe qatynasyn keńeitý aiasynda ámirliktiń «Wizz Air Abu Dhabi» loýkosteri biylǵy mamyr aiynda «Abý-Dabi – Almaty» jáne «Abý-Dabi – Nur-Sultan» baǵyttary boiynsha turaqty jolaýshylar áýe tasymalyn bastaidy. A. Mamin BAÁ batyrlarynyń «Ýahat ál-Karama» memorialyna gúl shoqtaryn qoiyp, «Masdar City» eko-qalasynyń aýmaǵynda júzege asyrylyp jatqan jobalarmen tanysty jáne Muhammed ben Zaid atyndaǵy jasandy zerde ýniversitetine bardy. Dýbai qalasynda Úkimet basshysy Dýbai halyqaralyq qarjy ortalyǵynyń (DIFC) jáne «Dýbai investitsiialyq korporatsiiasynyń» basshylyǵymen kelissóz júrgizdi, onyń barysynda QR men BAÁ qarjy-investitsiialyq yntymaqtastyǵyn, onyń ishinde AHQO alańynda odan ári damytý perspektivalary talqylandy.
Jumys saparyna Strategiialyq josparlaý jáne reformalar agenttiginiń tóraǵasy – AHQO basqarýshysy Qairat Kelimbetov, indýstriia jáne infraqurylymdyq damý ministri Beibit Atamqulov, aýyl sharýashylyǵy ministri Saparhan Omarov, ekologiia, geologiia jáne tabiǵi resýrstar ministri Maǵzum Myrzaǵaliev, ádilet ministri Marat Beketaev, Shyǵys Qazaqstan oblysynyń ákimi Danial Ahmetov, Qaraǵandy oblysynyń ákimi Jeńis Qasymbek, «Báiterek» UBH» AQ basqarma tóraǵasy Aidar Áriphanov, QR isker toptarynyń ókilderi jáne t. b. qatysty.
