QR Premer-Ministri Asqar Mamin Túrkiialyq jáne qazaqstandyq biznesmender qaýymdastyǵynyń basqarma Keńesiniń tóraǵasy, «Eksen» kompaniiasynyń iesi F.Develioglý bastap kelgen qaýymdastyq ókilderimen kezdesti. Bul týraly primeminister.kz saitynda habarlandy.
Eki el arasyndaǵy biznes qurylymdardyń ózara tiimdi yntymaqtastyǵyn nyǵaitý jáne Qazaqstanda jańa birlesken investitsiialyq jobalardy iske asyrý máseleleri talqylandy.
«Túrkiia Qazaqstannyń negizgi saýda seriktesteri sanalatyn 10 top el qataryna kiredi. Bizdiń elderdiń arasyndaǵy taýar ainalymy 2018 jyldyń qorytyndysy boiynsha $1,9 millirdtan asty. Biylǵy 7 ai ishinde ózara saýda kólemi 2018 jyldyń osyndai kezeńimen salystyrǵanda 73,5% ósti. Biz túrkiialyq kompaniialardyń Qazaqstanda ekonomikalyq jobalardy iske asyrýǵa qatysýyn joǵary baǵalaimyz. Bizdiń ortaq mindetimiz - investitsiialyq yntymaqtastyq deńgeiin kóterý», - dedi A. Mamin.
Úkimet basshysy túrkiialyq biznesti AÓK, jeńil ónerkásip, qurylys materialdary salalarynda eksportqa baǵdarlanǵan kásiporyndardy qurýǵa shaqyrdy.
Biyl 11 qarashada Ankarada ótkizý josparlanyp otyrǵan Qazaqstan-Túrkiia úkimetaralyq komissiia otyrysynyń aiasynda biznes-forým ótkiziledi.
Qazaqstanda túrli salalarda túrkiialyq kapitaldyń qatysýymen 2200 kásiporyn jumys isteidi. Túrkiiamen birlesip farmatsevtikalyq preparattar, elektrondy-optikalyq priborlar, alkogolsiz sýsyndar men konditerlik ónimderdi óndirý salalarynda $1,6 mlrd somasyna 34 iri investitsiialyq joba júzege asyryldy. Qazir qurylys jáne paidaly qazbalardy óńdeý tárizdi salalarda 2,2 mlrd somasyna 16 joba iske asyrylyp jatyr.
«Túrkiialyq jáne qazaqstandyq biznesmender qaýymdastyǵy» 2016 jyly QR Táýelsizdiginiń jáne Qazaqstan men Túrkiia arasyndaǵy diplomatiialyq qatynastardyń 25 jyldyǵyna orai qurylǵan. Oǵan«Ahsel Holding», «Alarko», GQ Management «Aykar Group», «Eksen Group», «Eurasian Machinery», «Efes Kazakhstan», «Coca-Cola», «Kassanov Investment Group», «Makyol», «Sembol-Rixos Group», «Wyndham Hotel Group», «A-SYS Engineering», «Ramstore», «Stone Decor» jáne qurylys, qonaq úi, indýstriialyq sektorlar, jeńil ónerkásip salalaryndaǵy basqa da kompaniialar kiredi.
