QR Premer-Ministri Asqar Mamin RF Úkimeti tóraǵasynyń orynbasarlary Aleksandr Novak pen Aleksei Overchýk bastaǵan delegatsiiany qabyldady. Bul týraly primeminister.kz saity habarlady.
Taraptar otyn-energetika sektoryndaǵy — jer qoinaýyn paidalaný, munai jáne gaz, elektr energetikasy salalaryndaǵy yntymaqtastyqtyń ózekti máselelerin talqylady. Sýtegi energetikasy salasyndaǵy yntymaqtastyq perspektivalaryna, Qazaqstannyń soltústik jáne shyǵys óńirlerin gazdandyrýǵa reseilik kompaniialardyń qatysýy máselesine erekshe nazar aýdaryldy.
Reseiden Qazaqstanǵa dizel otynyn jetkizý, Resei kómirsýtekteriniń QR aýmaǵy arqyly tasymaldanýy jáne ózge de máseleler qaraldy.
Munai-gaz himiiasy salasynda — polipropilen, polietilen, býtadien jáne onyń týyndylaryn óndirý boiynsha birlesken jobalardy iske asyrý barysy talqylandy.
«Samuryq-Qazyna» AQ men «QazMunaiGaz» UK» AQ «SIBÝR Holding» JAQ-pen birlesip, Atyraý qalasyndaǵy integratsiialanǵan gaz-himiia kesheniniń bazasynda 2022 jyldyń basynda jylyna 500 myń tonna polipropilen óndiretin birlesken kásiporyn ashýdy josparlaýda. Taraptar jylyna 1,25 mln tonna polietilen óndiretin zaýyt qurylysynyń birlesken jobasyn iske asyrý máselesin qarastyryp jatyr.
«QazMunaiGaz» UK» AQ «Tatneft» JAQ-pen birlesip, bitým modifikatsiiasynda qoldanylatyn býtadien kaýchýkterin óndirý, adgezivter, jelimder, rezeńkeler jáne ekologiialyq taza shinalar daiyndaý boiynsha birlesken jobany iske asyrýda. Jobany iske asyrý merzimi – 2021-2025 jyldar, óndiris qýaty – jylyna 186 myń tonna býtadien kaýchýkteri men 170 myń tonna izobýtan.
Taraptar ekijaqty jáne kópjaqty formattaǵy strategiialyq ózara is-qimyldyń barlyq baǵyttary boiynsha odan ári syndarly kelissózder júrgizýge ázirligin rastady.
Kezdesýge QR Premer-Ministriniń orynbasary Roman Skliar, «Samuryq-Qazyna» AQ basqarma tóraǵasy Almasadam Sátqaliev, energetika ministri Maǵzum Myrzaǵaliev, «QazMunaiGaz» UK» AQ basqarma tóraǵasy Alik Aidarbaev, «QazTransGaz» AQ bas direktory Qairat Sháripbaev, «Qazatomónerkásip» UAK» AQ basqarma tóraǵasy Májit Sháripov qatysty.
