QR Premer-Ministri Asqar Maminniń tóraǵalyǵymen ótken Investitsiialyq shtab otyrysynda 2021 jylǵy qańtar-sáýirdegi investitsiialardy tartý boiynsha atqarylǵan jumystyń qorytyndy kórsetkishteri qaraldy, dep habarlaidy "Ult aqparat".
Ulttyq ekonomika ministri Áset Erǵaliev osy jyldyń 4 aiynda taý-ken óndirisi ónerkásibin esepke qospaǵanda, negizgi kapitalǵa salynǵan investitsiialar kólemi 32,3% deńgeiinde ósim kórsetkenin aitty.
Ministr QR ekonomikasynyń qalpyna kelý traektoriiasyna shyǵýy aiasynda osy jyldyń 4 aiynyń nátijeleri boiynsha negizgi kapitalǵa salynǵan investitsiialar ósiminiń joǵary qarqyny óńdeý ónerkásibinde (112,8%), aýyl sharýashylyǵynda (66,1%) jáne qurylysta (72,4%) baiqalǵanyn atap ótti. Ulttyq ekonomikany qalpyna keltirýdiń mańyzdy faktorlarynyń biri qyzmet kórsetý sektoryndaǵy kórsetkishter boldy. Biylǵy qańtar-sáýir ailarynyń nátijeleri boiynsha sońǵy 12 aida alǵash ret kórsetiletin qyzmetter sektoryndaǵy ósý qarqyny oń dinamika kórsetti.
Kórsetilgen dinamika aiasynda negizgi kapitalǵa salynǵan investitsiialar aǵynynyń joǵary qarqyny saýda (28,3%), kólik jáne qoimalaý (27,6%), qarjy jáne saqtandyrý qyzmeti (28,6%), jyljymaityn múlik operatsiialary (27,5%), bilim berý (10,3%), óner, oiyn-saýyq jáne demalys (30,9%), sondai-aq aqparat jáne bailanys (61,2%) sekildi salalarda baiqaldy.
Negizgi kapitalǵa salynǵan investitsiialar boiynsha oń ósim qarqynyna 15 óńirde jáne respýblikalyq mańyzy bar qalalarda qol jetkizildi.
Kósh bastap turǵan óńirler — Almaty qalasy (+47,9%) jáne Nur-Sultan qalasy (+31,7%), Túrkistan (+42,6%), Jambyl (+30,4%), Qaraǵandy (+22,9%), Soltústik Qazaqstan (+16,7%) Qostanai (+11,6%) jáne Qyzylorda (+6,1%) oblystary. Batys Qazaqstan (-40,2%) jáne Atyraý (-37,8%) oblystarynda artta qalýshylyq baiqalady. Álemdegi kapital naryǵynyń qalpyna kelý serpinin jáne ulttyq ekonomikanyń investitsiialyq tartymdylyǵynyń ósýin eskere otyryp, biyl tikelei sheteldik investitsiialardyń jalpy aǵynynyń 11% deńgeiinde — $19 mlrd deiin ósýin qamtamasyz etý josparlanýda.
Otyrysta «Samuryq-Qazyna» AQ investitsiialyq jobalarynyń pýly qaraldy. «Samuryq-Qazyna» AQ basqarma tóraǵasy Almasadam Sátqaliev 31.12.2020 jylǵy jaǵdai boiynsha «Samuryq-Qazyna» AQ investitsiialyq portfeli seriktesterdiń úlesterin eskere otyryp, quny 73 trln teńge bolatyn 203 jobadan turatynyn atap ótti. Qazirgi tańda memlekettik jáne salalyq baǵdarlamalar aiasynda Atyraý qalasynda polipropilen óndirý jónindegi integratsiialanǵan gaz-himiia kesheniniń, «Beineý – Bozoi – Shymkent» gaz qubyrynyń, «UIMT» AEA infraqurylymy obektileriniń qurylysy, Ekibastuz GRES-1-niń 1-blogyn qalpyna keltirý, «Bogatyr» razrezinde kómir óndirý, tasymaldaý, ortashalaý jáne tieý tehnologiiasyn jańǵyrtý, Shelek dálizinde JES salý tárizdi iri investitsiialyq jobalar iske asyrylýda. 2021-2026 jyldar kezeńinde Qor Mańǵystaý oblysynyń magistraldyq gaz qubyrlaryn jańǵyrtý, Almaty energiia keshenin gazdandyrý, Ekibastuz GRES-2 keńe itý jáne qaita jóndeý, JEK salasyndaǵy jobalar jáne t. b. boiynsha infraqurylymdyq jobalardy iske asyrýdy kózdeidi. Ulttyq ekonomikanyń qurylys materialdaryndaǵy ózindik jetkiliktiligin qamtamasyz etý jónindegi sharalar aiasynda sanfaians, jylylaǵysh, qysh taqtaisha, eden jabyndary jáne t. b. óndiretin zaýyttar salý siiaqty investitsiialyq jobalardy iske asyrý josparlanyp otyr.
«Josparlanǵan investitsiialyq jobalardy iske asyrý jáne investitsiia tartý kólemin odan ári arttyrý úshin túbegeili sharalar qabyldaý qajet. «Samuryq-Qazyna» qory energetika, munai-gaz himiiasy, kólik jáne logistika jáne basqa da strategiialyq salalardaǵy iri jobalarǵa investitsiia salýǵa nazar aýdarýy tiis, bul ekonomikanyń damýyna mýltiplikativti áserin tigizedi», — dedi A. Mamin.
Otyrysta jergilikti atqarýshy organdar úshin 2021-2025 jyldarǵa arnalǵan tikelei sheteldik investitsiialardy tartý jónindegi nysanaly indikatorlar bekitildi.
