«Astana» halyqaralyq qarjy ortalyǵynda (AHQO) QR Premer-Ministri Asqar Maminniń tóraǵalyǵymen Eýraziialyq damý banki (EDB) Keńesiniń otyrysy ótti.
Bul týraly Premer-Ministrdiń baspasóz qyzmeti habarlaidy.
Sharaǵa bank aktsionerleriniń ókiletti ókilderi: Armeniiadan – vitse-premer M. Grigorian jáne qarjy ministriniń orynbasary A. Airapetian, Belarýsten – qarjy ministri M. Ermolovich jáne ekonomika ministri D. Krýtoi, Qyrǵyzstannan – qarjy ministri B. Jeenbaeva jáne ekonomika ministri S. Mýkanbetov, Reseiden – úkimet tóraǵasynyń birinshi orynbasary – qarjy ministri A. Silýanov jáne qarjy ministriniń orynbasary S. Storchak, Tájikstannan – qarjy ministri F. Kahhorzoda jáne ekonomikalyq damý jáne saýda ministri Z. Zavkizoda, Qazaqstannan – Premer-Ministrdiń birinshi orynbasary – Qarjy ministri Á. Smaiylov qatysty.
Kezdesý aldynda AHQO aýmaǵynda Bank keńsesin ashý resmi rásimi ótti – EDB «Astana» halyqaralyq qarjy ortalyǵynda ornalasqan alǵashqy damý banki boldy.
« EDB Eýraziialyq ekonomikalyq odaqqa múshe memleketterdiń yntymaqtastyǵyn damytýǵa jáne birlesken jobalardy qarjylandyrýǵa qomaqty úles qosýda », - dedi A. Mamin.
Otyrysta Eýraziialyq damý bankiniń 2019 jylǵy jumys qorytyndysy talqylanyp, 2020 jylǵa arnalǵan mindetter aiqyndaldy. Keńes iri investitsiialyq jobalardy bekitý, tsifrlyq bastamalardy iske asyrý jáne Bank qatysýshylarynyń quramyn keńeitý máselelerin qarastyrdy.
Osy jyly 1 jeltoqsandaǵy jaǵdai boiynsha EDB-nyń investitsiialyq qorjyny $4 mlrd-tan asty, ósimi 2018 jylmen salystyrǵanda 18% ($621 mln) qurady. Biyl 11 aida $1,2 mlrd jýyq kólemdi qamtityn 23 jańa investitsiialyq jobaǵa qol qoiyldy, olar energetika (27,9%), infraqurylym (22,4%), qarjy sektory (15%) jáne basqa da salalardy qamtidy.
Banktiń investitsiialyq qorjynynyń elder qurylymy boiynsha Reseidegi (42,8%) jáne Qazaqstandaǵy (42%) jobalary basym. Onyń 11,2% - Belarýske, 2,3% – Armeniiaǵa, 1,6% – Qyrǵyzstanǵa, 0,1% – Tájikstanǵa tiesili.
Biyl EDB qarjy institýttaryn – jergilikti bankterdi eseptik qyzmet kórsetýdi iske qosty, osylaisha, «bankter úshin bank» tujyrymdamasyn júzege asyrdy, jáne jergilikti birjalardy qamtydy. 1 jeltoqsandaǵy jaǵdai boiynsha 40 qarjy institýty úshin 134 esepshot ashyldy.
