Qazaqstan 2020 jyly Dúniejúzilik saýda uiymy 12-shi ministrlik konferentsiiasyn ótkizýge 2,85 mlrd teńge qarjy jumsaidy. Bul jaiynda Májilis depýtattarynyń resmi saýalyna orai QR Premer-Ministri Asqar Maminniń jaýabynda aitylǵan, dep habarlaidy "Ult aqparat".
Onyń atap ótýinshe, 2019 jyldyń 25-28 maýsymynda Dúniejúzilik saýda uiymy bas direktorynyń orynbasary K.Braýner bastaǵan DSU-nyń maqsatty toby Nur-Sultan qalasyna kelip ketti. Sapar qorytyndysynda DSU hatshylyǵy Qazaqstan úshin DSU ministrlik konferentsiiasyn ótkizý boiynsha jan-jaqty nusqaýlyq ázirledi.
«Munan ary DSU 12-shi ministrlik konferentsiiasyn uiymdastyrý daiyndyǵy atalǵan qujatty basshylyqqa ala otyryp júzege asyrylady. Nusqaýlyq 12-shi ministrlik konferentsiiasyn ótkizýdiń uiymdastyrý máseleleri boiynsha talaptardy qamtidy. Aitalyq, nusqaýlyq talaby negizinde tiisti biýdjettik ótinim qalyptastyrylyp, shyǵyndary eseptelindi jáne Respýblikalyq biýdjettik komissiia maquldady. Boljaldy esepteýlerge sáikes, 12-shi ministrlik konferentsiiasy jalpy qatysýshylarynyń búkil shyǵyndary shamamen 18 mlrd teńgeni quraidy. Bul rette Qazaqstan Respýblikasynyń sharany uiymdastyrýǵa arnalǵan shyǵystary 2,85 mlrd teńge bolady. DSU hatshylyǵynyń 1,2 mln shveitsar franki kólemindegi shyǵystary óz qyzmetkerleriniń (shamamen 200 adam) jáne damýy tómen elder (36 el) delegattarynyń jatyn oryndary men ushyp kelý-ketý tólemderin qamtidy. Qalǵan soma – bul sheteldik delegattardyń (DSU-ǵa múshe 164 eldiń Saýda ministrleri men parlamentariileri, sonymen qatar birqatar memlekettiń jáne iri halyqaralyq kompaniialardyń, úkimettik emes uiymdardyń basshylary) ushyp kelý-ketýmen, jatyn oryn jáne tamaqtanýymen jáne basqalarymen bailanysty shyǵyndary», - dep túsindiredi Úkimet basshysy.
Asqar Maminniń atap ótýinshe, atalǵan sharany uiymdastyrýǵa jumyldyrylǵan jeke sektordyń, kólik kompaniialarynyń, qoǵamdyq tamaqtaný oryndarynyń, qonaq úi keshenderiniń aýdarymdary túrinde biýdjetke shamamen 240-360 mln teńge salyq túsetindigi boljanyp otyr.
Esterińizge sala keteiik, 2018 jyldyń 27 shildesinde Dúniejúzilik saýda uiymy Bas keńesiniń otyrysynda uiymǵa múshe elder 2020 jyldyń jazynda 12-shi DSU ministrlik konferentsiiasyn Nur-Sultanda ótkizý týraly sheshimdi bir aýyzdan qoldaǵan bolatyn.
