Ákimdikter men Densaýlyq saqtaý ministrligi vaktsina alatyndardyń sanyn arttyrýdy qamtamasyz etýi kerek. Bul týraly Úkimet otyrysynda QR Premer-Ministri Asqar Mamin aitty, dep habarlaidy "Ult aqparat".
«Sáýir aiynda vaktsina alatyndardyń, ásirese egde jastaǵy adamdardyń sany eleýli artatyn bolady. Bul sharalar turǵyndarda ujymdyq immýnitet qalyptastyryp, infektsiianyń odan ári taralýyn shekteýge múmkindik beredi. Osy faktor pandemiiamen kúresýde jáne ekonomikalyq ósýdi qalpyna keltirýde asa mańyzdy bolyp sanalady», - deidi QR Premer-Ministri Asqar Mamin.
Osyǵan bailanysty ol Densaýlyq saqtaý ministrligi men óńir ákimderine birqatar tapsyrma júktedi.
«Birinshi, ákimdikter men Densaýlyq saqtaý ministrligi vaktsina alatyndardyń sanyn arttyrýdy qamtamasyz etsin. Ol úshin vaktsinany saqtaý men tasymaldaý úshin qajetti jaǵdailary bar egý kabinetterin qosymsha ashý kerek. Aqparat ministrligimen birlesip, halyqqa aqparattyq-túsindirý jumystaryn kúsheitý qajet. Ákimdikterdiń saitynda vaktsinatsiia, onyń paidasy men egý pýnkteriniń mekenjailary týraly naqty aqparat joq. Halyq arasynda vaktsinalaýdyń mańyzdylyǵy týraly durys pikir qalyptastyrý úshin qoǵam men meditsina qyzmetkerleriniń arasynda seminarlar uiymdastyrý kerek. Densaýlyq saqtaý ministrligine naýryz aiynyń sońyna deiin egý pýnkteriniń daiyndyǵyn baqylap, vaktsinany qajetti kólemde, ýaqytyly jetkizý úshin barlyq máselelerdi sheshýdi tapsyramyn», - dedi ol.
Sondai-aq A.Mamin óńir ákimdikteri turǵyndardyń, ásirese, ujymdarda, bilim berý uiymdarynda shekteý sharalarynyń saqtalýyn qamtamasyz etýdi tapsyrdy.
«Ekinshi, adamdar kóp jinalatyn oiyn-saýyq is-sharalarynyń ótkizilýine jol berilmesin. Aldaǵy mereke kúnderi osyny esten shyǵarmaý kerek. Ishki ister, Densaýlyq saqtaý ministrlikterimen birlesip, monitoringileý toptarynyń jumysyn kúsheitsin jáne tártip buzýshylardy qatań jaýapqa tartsyn. Úshinshi, densaýlyq saqtaý ministrligi ákimdiktermen birlesip, aýrý oshaqtarynda jedel shara qoldanyp, shekteý sharalaryn qaita qarasyn. Naýqastarmen bailanysta bolǵan barlyq adamdarǵa koronavirýsqa testileý mindetti túrde júrgizilip, baqylaýda bolýy kerek. Bul rette kúndelikti júrgiziletin PTR-testileý deńgeii tómendemeýi tiis», - deidi QR Premer-Ministri Asqar Mamin.
