Almaty oblysyna jumys sapary aiasynda QR Premer-Ministri Asqar Mamin Qazaqstannyń elordasy - Astana qalasynyń Nur-Sultan bolyp qaita atalýyna qatysty pikir bildirdi, dep habarlaidy QazAqparat.
Premer-Ministr qalanyń Tuńǵysh Prezident - Elbasynyń qurmetine orai qaita atalýy aitýly tarihi oqiǵa bolyp tabylatynyn atap kórsetti.
«Qazirgi tańda bizdiń kóz aldymyzda táýelsiz Qazaqstannyń tarihi jylnamasynyń jańa betteri jazylýda. Sondyqtan memleketimizdiń jáne onyń jańa elordasynyń negizin qalaýshy, Uly dalanyń tórinde damyǵan memleket qurǵan Elbasymyz Nursultan Ábishuly Nazarbaevtyń uly tulǵasyn osylai tarihi túrde dáripteý - bul bizdiń keleshek óskeleń urpaq aldyndaǵy paryzymyz», - dedi Asqar Mamin.
Onyń aitýynsha Nur-Sultan qalasy Elbasy N. Nazarbaevtyń jańa ekonomikalyq modeliniń negizgi qozǵaýshy kúshine ainaldy.
«Jańa astanamyzdyń qalyptasýynyń alǵashqy jyldarynda Elbasymyzdyń «Astananyń gúldenýi - Qazaqstannyń gúldenýi» baǵdarlamasy astananyń ǵana emes, elimizdiń barlyq óńirleriniń damýyna qýatty serpin berdi. Álemdik arenada Qazaqstannyń yqpaly men róli jyl ótken saiyn artyp keledi. Bul - sózsiz bizdiń Elbasymyzdyń eren eńbegi. Astananyń Tuńǵysh Prezident esimimen atalýy - ádiletti ári der kezinde jasalǵan sheshim. Jańa ataýǵa ie bolǵan astananyń aldynda budan da biik, uly maqsattar tur. Sonymen qatar, bul - jańa múmkindikter ári úlken jaýapkershilik»,- dedi Premer-Ministr.
Úkimet basshysy: «Biz bárimiz de astanalyqtar bolyp qalamyz, óitkeni Nur-Sultan - Qazaqstannyń Astanasy!» dep atap ótti.
Esterińizge sala keteiik, búgin Memleket basshysy Qasym-Jomart Toqaev Qazaqstan Respýblikasynyń astanasy - Astana qalasyn Qazaqstan Respýblikasynyń astanasy - Nur-Sultan qalasy dep qaita ataý týraly Jarlyqqa qol qoidy.
