QR Premer-Ministri Asqar Mamin Arys qalasyndaǵy jumys saparyn qorytyndylady, dep habarlaidy QazAqparat tilshisi.
Arystaǵy jarylystan búlingen nysandardy tekserý qorytyndysy boiynsha Úkimet basshysynyń tóraǵalyǵymen keńes ótti. Keńes barysynda QR indýstriia jáne infraqurylymdyq damý ministriniń orynbasary Qaiyrbek Óskenbaev tyndyrylǵan sharýalar týraly aqparat berdi.
«Qazir barlyq sektorda jóndeý jumystary qyzǵan. Barlyǵy 676 úi qoldanysqa berildi. Óńirler boiynsha aitsaq, Aqtóbe - 236, BQO - 162, Nur-Sultan - 80, SQO - 47, Qyzylorda - 41, Shymkent - 31, Jambyl - 21, Aqmola - 18, Mańǵystaý - 12, Qostanai - 12, Almaty - 9, Qaraǵandy - 5, Atyraý - 2 úide jóndeý jumystaryn aiaqtady. Áli 3040 úide jóndeý jumystary júrip jatyr. Nysandarda 190 qurylys kompaniiasynan 4 699 qyzmetker men 207 arnaiy tehnika jumyldyrylǵan», - dedi Qaiyrbek Óskenbaev.
Vitse-ministr áleýmettik nysandardyń jaǵdaiyna da toqtaldy. Jalpy qalada 66 áleýmettik nysan bar. Onyń 54-i bilim berý, 8-i densaýlyq saqtaý, tórteýi sport mekemeleri.
«Áleýmettik nysandardyń barlyǵy búlingen bolatyn. Olardyń 62-si kúrdeli jóndeýden ótip, tórteýi «Samuryq-Qazyna» AQ-nyń qarajatymen tolyq qalpyna keltiriledi. Qazirdiń ózinde 62 nysandy qalpyna keltirý jumystary júrip jatyr. 53 bilim berý, 6 densaýlyq, 3 sport nysanyn jóndeýge 30 kompaniiadan 1372 qurylysshy men 57 arnaiy tehnika tartylǵan», - dedi Qaiyrbek Óskenbaev.
Aldaǵy aptada olardyń qataryn taǵy 600-700 jumysshy tolyqtyrmaq.
Eske salsaq, búgin QR Premer-Ministri Asqar Mamin Arys qalasyndaǵy 300 oryndyq mektepke barǵan bolatyn.
Arystyqtarmen kezdesý barysynda Úkimet basshysy apta saiyn Arysqa kelip, jóndeý jumystaryn tekserip turatynyn aitqan.
Kezdesýlerdiń birinde úii, dúkeni jáne úsh kóligi órtenip ketken turǵyn Úkimet basshysynan kómek surady.
