Almatyda pilottyq rejimde «Ashyq» jobasy iske qosyldy, dep habarlaidy QazAqparat.
«Ashyq» jobasy QR kodyn paidalaný arqyly mekemege kelýshilerdiń mártebesin anyqtaýǵa múmkindik beredi.
Mekemege kelgen saiyn PTR test tapsyrý, tapsyrmaý qajettiligi týraly qalanyń bas memlekettik sanitarlyq dárigeri Jandarbek Bekshin aitty.
«PTR test tapsyrýdyń qajeti joq. Ony úsh kún saiyn tapsyra da almaisyz. Eger PTR test tapsyrsańyz, onda qorǵaldyńyz, sizge jasyl tús mártebesi beriledi. PTR testi qaita qaita tapsyrý mindetti emes. Eger siz «qyzyl» málimetter bazasynda bolsańyz, ol - juqtyrǵan adam, al «sary» - juqtyrǵan adammen bailanys bolǵan degen sóz. Osy eki tús eń qaýipti jáne olar oqshaýlanýy tiis. Bizdiń mindetimiz - olardyń qoǵamdyq nysandarǵa kirýine jol bermeý», - dedi J.Bekshin.
Onyń aitýynsha, PTR test túrli jarysqa qatysýshylar men basqa elge ushqysy keletinder úshin berilýi kerek.
«Keibir sporttyq is-sharalarda, básekeniń bastalýyna eki kún qalǵanda jarysqa qatysýshy PTR testin tapsyrýy kerek dep algoritmde jazylǵan. Al shetelge ushqanda áýejaiǵa barasyz. Onda sizden PTR test talap etedi», - dedi spiker.
