Tsifrlyq damý, innovatsiialar jáne aeroǵarysh ónerkásibi ministrligi «Ashyq» qosymshasynda vaktsina alǵandar mártebesi ne úshin kórsetilmeitinin túsindirdi, dep habarlaidy QazAqparat.
«Qazirgi ýaqytta «Ashyq» mobildi qosymshasynda vaktsina alǵandar kórsetilmeidi. Integratsiia jumysyn 1 shildege deiin aiaqtaýdy josparlap otyrmyz», - dedi QR DSM Elektrondyq densaýlyq saqtaýdy damytý departamentiniń direktory Beibit Esenbaev Ortalyq kommýnikatsiialar qyzmetinde ótken baspasóz máslihatynda.
Tsifrlyq damý, innovatsiialar jáne aeroǵarysh ónerkásibi vitse-ministri Áset Turysov vaktsina alǵan azamattar boiynsha integratsiiany nege buryn qarastyrmaǵanyn túsindirdi.
«Bastapqyda pilottyq joba vaktsina alǵandardyń mártebesi máselesin qarastyrǵan joq, óitkeni Densaýlyq saqtaý ministrligi bul máseleni uzaq ýaqyt pysyqtady jáne bul basqa jumys baǵyty boldy. Biz «Ashyq» jobasynda turǵyndar tapsyratyn PTR testi bazasyna kóbirek nazar aýdardyq jáne bul mehanizm pysyqtaldy. Vaktsina alǵandar sany kóbeigen soń, árine, olardyń mártebesin belgileý máselesi týyndady. Osyǵan sáikes, alda integratsiialyq jumystar júrgizemiz», - dedi Áset Turysov.
