Almaty qalalyq sanitarlyq-epidemiologiialyq baqylaý departamentiniń basshysy Jandarbek Bekshin BAQ ókilderimen onlain brifing barysynda Ashyq qosymshasy arqyly tekseriletin JSN málimetteri qaida jiberiletinin aitty, dep habarlaidy QazAqparat.
«JSN málimetteri QR DSM-da ornalasqan ortalyq serverge jiberiledi. Qazir sáikesinshe shara qabyldaý úshin algoritm oilastyrylyp jatyr. Biznes nysany shara qabyldai almaidy, ol tek ereje buzýshylardy anyqtaidy», - dedi qalanyń bas sanitar dárigeri.
Júieniń tehnikalyq sipattamalary jaily TOO Digital innovation and transformation JShS direktory Vitalii Pýstovoitenko jaýap berdi.
Onyń aitýynsha, azamattar jeke málimetteriniń bireýge jariia bolatynyna múlde qaýiptenbeýi kerek.
«Qazir bul málimetterdi eshqaida jibermeimiz. Biz tek JSN sandaryn bazaǵa engizip tekseremiz. JSN nómiri boiynsha adamnyń qyzyl, sary, nemese jasyl mártebesi anyqtalady. Eger málimet bolmasa, adam úsh kún ishinde PTR test tapsyrmaǵan. Eger 7-8 kún buryn tapsyrsańyz, nátije teris bolsa, sizdiń mártebeńiz kók bolady. Al «qyzyl» mártebe jasyl mártebege aýyspaiynsha ózgermeidi. Eger adam úsh kún jasyl mártebede júrse, 2-3 kúnnen soń qaitadan kók mártebege túsedi. Iaǵni bazada tirkelip qalyp qoimaidy», - dedi Vitalii Pýstovoitenko.
Tsifrlandyrý salasynyń mamany aitqandai, Ashyq qosymshasy kásipkerler arasynda oń baǵalanyp otyr.
