QR Aýyl sharýashylyǵy ministrligi 4 jyldyń ishinde shetelden importtalatyn aýyl sharýashylyǵy ónimderin otandyq ónimderge almastyrýdy josparlap otyr, dep habarlaidy "Ult aqparat" ministrliktiń baspasóz qyzmetine silteme jasap.
Azyq-túlik taýarlarynyń negizgi túrlerinen Qazaqstan ózin 80 paiyzǵa qamtamasyz etedi, al keibirinen tipti artyqshylyq bar. Tek alty taýar, olar: alma, balyq, shujyq ónimderi, irimshik, súzbe, qant jáne qus eti boiynsha import táýeldiligi saqtalýda. Desekte, bul olqylyqty QR AShM jaqyn ýaqytta joiýdy josparlap otyr.
Aǵymdaǵy jyly jylyna 105 myń tonna sút óndiretin 25 taýarlyq sút fermasy, 3 et kombinaty, qýattylyǵy 73 myń tonnalyq 8 qus fabrikasy salynatyn bolady, 2 myń gektarǵa baq otyrǵyzý josparlanǵan. Sondai-aq, Jambyl jáne Pavlodar oblystarynda jylyna jalpy óndiris qýaty 200 myń tonna qant óndiretin 2 zaýyttyń qurylysy bastaldy. Sonymen qatar, qoldanystaǵy úsh qant zaýyty jańǵyrtylady.
Budan basqa, sýarmaly jerlerdiń kólemi azyqtyq daqyldary úshin – 45 myń ga, kókónisterge 15 myń ga keńeitiledi. Sondai-aq, ártaraptandyrý boiynsha tiimdiligi joǵary «maily jáne burshaqty» daqyldarǵa arnalǵan egistik alqaby ulǵaitylatyn bolady.
Atalmysh sharalar aǵymdaǵy jyly aýyl sharýashylyǵy ónimderi importynyń jalpy úlesin 36,2%-dan 31,2%-ǵa deiin qysqartýǵa, al 2024 jylǵa qarai eldiń ishki naryǵyn otandyq azyq-túlikpen tolyq qamtamasyz etýge múmkindik beredi.
