Foto: senate.parlam.kz
Senat tóraǵasy Máýlen Áshimbaev memlekettik qorǵanys kásiporyndaryn jekeshelendirý jóninde pikir bildirdi, dep habarlaidy Kazinform.
Senat depýtattary ulttyq zańnamaǵa qaýipsizdikti qamtamasyz etý jáne arnaýly memorgandardaǵy qyzmet máselesi boiynsha ózgeris engizýdi kózdeitin zańdy eki oqylymda talqylap jatyr.
Atalmysh zań jobasynda qorǵanys-ónerkásip keshenindegi strategiialyq obektiler tizbesin qalyptastyrý, memleket menshigindegi kásiporyndardy «altyn aktsiia» úlesi saqtalǵan jaǵdaida jekeshelendirýge ruqsat etý normalary usynylǵan.
Palata tóraǵasy Máýlen Áshimbaev atalǵan zańdaǵy qujattyń osy bóligine pikir bildirdi.
«Jalpy memlekettik qorǵanys kásiporyndarynyń jaǵdaiyna bailanysty biraz suraq bar. Bizde «Qazinjiniring» degen kompaniia jumys istep jatyr. Ony bárimiz bilemiz. On shaqty zaýyty bar. Biraq solardyń memlekettik organdar tarapynan tapsyrys alý máselesinde kóptegen túitkil bar ekeni jasyryn emes. Bular - memlekettiń qorǵanys áleýetine úles qosyp júrgen kásiporyndar. Bizge olardy qoldaýdyń bir qalybyn, formatyn tabý kerek. Eger memleketke ondai kásiporyndar kerek bolmasa, «bizge ol kerek emes, shetelden satyp alamyz» dep ashyq aitý kerek. Oǵan jetkizýge bolmaidy ǵoi. Ózimizde qorǵanys kásiporyndary bolýy kerek. Bul — ulttyq qaýipsizdik máselesi. Biz olar memlekettiń menshiginde bolýy kerek dep sanaimyz. Sol sebepti osyndai kásiporyndardy qoldaýdyń bir júieli tetikteri kerek ekeni anyq. Sizderge osy máseleni bizdiń halyqaralyq ister, qorǵanys jáne qaýipsizdik komitetimen birge pysyqtap, zań aiasynda qandai múmkindikter bar ekenin anyqtaý kerek dep esepteimiz. Zańǵa memlekettik kásiporyndardy qoldaý baǵytynda ózgeris engizý kerek bolsa, ol jaǵyn depýtattarmen qarastyrýǵa daiynbyz. Biraq sizderden naqty pozitsiia, ustanym kerek. Eger bizdiń ustanymymyz bolmasa, ol kásiporyndar ózimen-ózi júretin bolsa, memlekettik tapsyrys ózimen-ózi qalyptasyp jatatyn bolsa, júieli jumys bolmaityny anyq. Sol sebepti osy baǵyttaǵy jumysty jańa deńgeige shyǵarasyzdar dep senemiz. Biz birge jumys isteýge daiynbyz», — dedi Máýlen Áshimbaev.
