QR Parlament Senatynyń tóraǵasy Máýlen Áshimbaev joǵarǵy palatanyń 2021jylǵy jumysyn qorytyndylady, dep habarlaidy QazAqparat.
«Búgin Senattyń osy jyldaǵy qorytyndy otyrysyn ótkizdik. 2021 jyl elimiz úshin erekshe jyl boldy. Qasterli Táýelsizdgimizdiń 30 jyldyǵy atap óttik. Parlament Úkimetpen birlesip Prezident Joldaýy men tapsyrmalaryn iske asyrýdy zańnamalyq turǵydan qamtamasyz etýde. Sonyń nátijesnide biyl Parlament 104 zań qabyldady. Qabyldanǵan zańdar elimizdiń saiasi, áleýmettik-ekonomikalyq ornyqty damýyn kózdeidi», - degen Máýlen Áshimbaev Prezident tapsyrmasy boiynsha qabyldanǵan birqatar mańyzdy zańdarǵa toqtaldy.
Olardyń qatarynda jer qatynastary máselelerin, memlekettik jáne jergilikti basqarý júiesin retteýge, ólim jazasynan bas tartýǵa, quqyq qorǵaý organdaryn reformalaýǵa, eldegi biznes ortany jaqsartýǵa, otandyq ónerkásipti jetildirýge arnalǵan zańdar jáne taǵy basqa normalar bar.
Senat tóraǵasy depýtattardyń zań shyǵarýǵa bastamashy bolýda jumys istegenin atady.
«Jyl ótken saiyn bul jumystyń sany da, sapasy da artyp keledi. Biyl qabyldanǵan ár tórtinshi zańǵa Parlament depýtattary bastamashy boldy. Olardyń qatarynda elimizdiń sot júiesin odan ári reformalaýǵa, azamattyq protsesti jeńildetýge, tatýlastyrý rásimderin qoldaný salasyn keńeitýge, jeke tulǵanyń jalǵyz baspanasyn kepil retinde qabyldaýǵa shekteý qoiýǵa jáne basqa da máselelerdi retteýge baǵyttalǵan mańyzdy zańdar bar. Prezidenttiń tapsyrmasy boiynsha depýtattardyń bastamashy bolýymen ázirlengen zańdardyń qatarynda «Adam quqyqtary jónindegi ýákil» týraly zań da bar», – dedi Máýlen Áshimbaev.
Sondai-aq, ol 2021 jyly senatorlar zań shyǵarýmen qatar basqa da baǵyttar boiynsha tabysty jumys istegenin aityp, óńirlerdegi máselelerdi sheshý, kásipkerlikti damytý jáne ulttyq qundylyqtardy dáripteý baǵyttary Senat ókilderiniń únemi nazarynda bolǵanyn eske saldy.
«Biyl biz zań shyǵarýmen qatar parlamenttik qyzmetimizdiń ózge de baǵyttary boiynsha mazmundy ári nátijeli jumys istedik. Senatorlar mańyzdy taqyryptar boiynsha memlekettik organdarǵa 100-ge jýyq depýtattyq saýal joldady. Senat qabyrǵasynda qoǵamdy alańdatqan ózekti máselelerge arnalǵan 80-nen astam is-shara ótkizildi», – dep túiindedi Senat tóraǵasy.
