Erkin kúresten Qazaqstan komandasy úshin biylǵy maýsym tabysty aiaqtaldy, dep habarlaidy "Ult aqparat".
Áset Serikbaev baptaityn balýandar Aziia chempionatynan eki altyn enshilese, óz jerimizde ótken álem birinshiliginen úsh medal, tórt joldamaǵa qol jetkizdi. Olympic.kz saityna suhbat bergen bas bapker jyldyń basty sporttyq oqiǵalaryna toqtalyp, erekshe jetistigimen kózge túsken balýandarǵa óz baǵasyn berdi.
«2019 jylǵy maýsym biz úshin óte jaýapty boldy. Óitkeni qurlyq dodasynan bólek, óz elimizde alǵash ret uiymdastyrylǵan litsenziialyq álem chempionatynda baq synadyq. Mundai iri básekede joldamadan bólek, joǵary deńgeide óner kórsetý, medal alý, jankúier aldynda uiatqa qalmaý degen faktorlar da bar. Qýanyshqa qarai, Olimpiada qarsańyndaǵy maýsymdy sátti aiaqtap otyrmyz. Qańtar aiynda Shymkent qalasynda kúres túrlerinen dástúrli Spartakiada ótip, sol synnan soń Aziia chempionatyna qatysatyn komanda jasaqtaldy.
Sáýir aiynda Qytaida ótken Aziia chempionatynda Nurǵoja Qaipanov pen Daniiar Qaisanov jeńimpaz atandy. Saiatbek Oqasov finalda utyldy. Sodan soń Daǵystandaǵy halyqaralyq týrnirge, Italiianyń Sassari qalasyndaǵy reitingilik jarysqa qatysyp, júldeli oryndadan kórindik. Álem chempionaty qarsańynda Polshada eki aptalyq oqý-jattyǵý jiynyna qatysqanymyz da bar. Nur-Sultandaǵy álem chempionatynyń nátijesin barshańyz kórdińizder. Eki qazaq balýany finalda kúresip, Dáýlet Niiazbekov pen Nurǵoja Qaipanov kúmis júldeger atandy. Sonymen qatar, birneshe balýanymyz qola júlde úshin kúresip, Nurislam Sanaev úshinshi orynǵa taban tiredi. Tokio Olimpiadasyna jeńip alǵan tórt joldamamyz da bar.
Shyny kerek, buǵan deiin bizdiń balýandar álem chempionatynan eki kúmis, bir qola medal alyp kórmegen. Sol sebepti, muny eń úlken nátije dep aitar edim. Komandalyq esepte Reseiden keiingi ekinshi orynǵa kóterildik. Bul buryn-sońdy bolmaǵan kórsetkish. Bas bapker retinde Nurǵoja Qaipanovty jyldyń úzdik sportshysy dep aitar edim. Nebári 20 jastaǵy balýan bir jylda múmkin bolǵan týrnirlerdiń bárinde biikten kórindi. Aziia chempiony atanyp, álem birinshiliginiń finalynda beldesti.
Máselen, Dáýlet Niiazbekov pen Nurislam Sanaevtan biz júlde kúttik. Sebebi, Dáýlet úsh ret Aziiany utsa, Sanaev álem chempionatynda alysqa barǵan balýan. Sondyqtan, olar jaqsy nátije kórsetýge mindetti edi. Al Álisher Erǵali men Nurǵoja Qaipanovtar kútpegen jerden keremet jetistikke qol jetkizdi», - deidi Áset Serikbaev.
