«Azamattarǵa arnalǵan úkimet» memlekettik korporatsiiasynyń basqarma tóraiymy Ásemgúl Baltasheva alaiaqtardyń paida tabý úshin qoldanatyn aila-amaldary týraly aityp berdi, dep habarlaidy QazAqparat.
«Máselen, Pavlodarda ózin HQO qyzmetkerimin dep tanystyrǵan bireýler azamattarǵa qońyraý shalyp, nesie boryshyn ótemese, JSN nómirin buǵattaimyz dep qorqytqan. Alaiaqtar azamattardyń áleýmettik jelilerdegi paraqshalaryna jazyp, SMS jiberip, telefondaryna qońyraý shalyp mazalaǵan. Keiin aqsha aýdarylýy tiis bank kartasynyń nómirin aityp otyrǵan. Al negizinde memlekettik korporatsiianyń qyzmetkerleri azamattarǵa qońyraý shalmaidy. Olarda JSN buǵattaityn quzyreti joq», – dep eskertti Ásemgúl Baltasheva QR Sybailas jemqorlyqqa qarsy is-qimyl agenttiginde ótken brifing barysynda.
Qaraǵandylyq taǵy bir turǵyn alaiaqtyqtyń qurbany bola jazdaǵan. Oǵan «HQO qyzmetkerimin» dep qońyraý shalǵan adam Nur-Sultan qalasyndaǵy páter boiynsha kezeginiń jaqyndaǵanyn habarlaǵan. Sózderi dáleldi bolý úshin alaiaq tipten jalǵan qujattyń sýretin de jibergen. Degenmen, «páterge ie bolý úshin qaryzyńyzdy óteńiz» dep talap etken. Biraq taǵy da qandai nesieni jabý kerektigin naqtylamaǵan.
«Memlekettik korporatsiiada qujatta kórsetilgen turǵyn úi baǵdarlamasy týraly esh málimet joq jáne ol týraly halyqty qulaǵdar etpeimiz. Bul – alaiaqtyqtyń taǵy bir shemasy dep oilaimyz, olar tek sengish azamattardyń aqshasyn kez kelgen jolmen tartyp alýdy kózdeidi», – deidi basqarma tóraiymy.
Ásemgúl Baltasheva qazaqstandyqtarǵa qyraǵylyq tanytýǵa, jalǵan aqparatqa senbeýge jáne mundai jaǵdailar kezdesken jaǵdaida, quqyq qorǵaý organdaryna habarlaý qajettigin eskertti.
