Qazaqstandyq aralas jekpe-jek sheberi Arman "Suńqar" Ospanov Almatyda ótken ASA 105 týrnirinde reseilik Rasýl Mirzaevty birinshi raýndta nokaýtpen utty, dep habarlaidy "Ult aqparat".
Reseilik sportshy jekpe-jekti shiraq bastaǵan. Degenmen qorǵana júrip aiqasqan Arman qarsylasynyń osal tusyn taba bildi.
Qazaqtyń «Suńqary» men Qap taýynyń «Qara jolbarysynyń» aiqasy kópke sozylǵan joq. Arman Rasýldy alǵashqy raýndta-aq nokaýtqa jiberip, jeńisti julyp aldy.
- Braziliialyqtan jeńilgennen keiin Qazaqstanda jekpe-jek ótkizbeimin dep oilaǵanmyn. Qoldaýshylarym barda, komandam barda qaita oraldym, - dedi jekpe-jek sońynan otandasymyz.
30 jastaǵy Arman Ospanov (9-3) pen 33 jastaǵy Rasýl Mirzaevtyń (18-2) aiqasy buǵan deiin birneshe márte josparlanǵanymen, ártúrli sebeppen ótpei qalǵan edi.
Týrnin sheńberinde Qazaqstandyq Asyljan Baqytjanuly da jarqyn jeńiske jetti. Ispan sportshysy Daniel Toledony birinshi raýndta nokaýtpen utty. Qarsylasy jaǵyna tigen joiqyn soqqydan keiin jer qushty.
Asyljan jekpe-jekti shiraq bastady. Qarsylasyn ár sát baqylaýda ustap, kezdesýdi erte aiaqtaýǵa umtyldy. Onyń qateligin kútip, óz múmkindigin múlt jibermeýge tyrysty. Qazaqstandyq sportshynyń jaǵynan urǵan birneshe soqqysy dál tiip, qarsylasy nokaýtqa tústi.
Almatydaǵy jekpe-jekterde ózge de qazaqstandyq sportshylar jinalǵan jurtqa jarqyn jeńis syilady. Nursultan Qasymhanov (10-2) belarýs sportshysy Ivan Jvirbliiany (7-5), Evgenii Egemberdiev (11-2) poliak Karol Selinskidi (17-9) birinshi raýndta jeńip shyqty. Artem Reznikov reseilik Hamzat Aýshevti qylqyndyrý ádisimen utty.
Al jaraqat alyp qalǵan Ermek Tlaýov reseilik Alihan Sýleimanovqa jol berdi.
