"Mádeniet jáne sport ministri úkimet otyrysynyń úzilisinde Qazaqstan quramasynyń Olimpiada aýylyna qalai qonystanǵanyn jáne sportshylarymyzdyń Rio-de-Janeirodaǵy dodanyń aqtyq syndaryna qalai daiyndalyp jatqanyn aityp berdi", - dep habarlaidy Ult.kz tilshisi kaz.tengrinews.kz portalyna silteme jasap.
Mádeniet jáne sport ministri Braziliiada jazǵy Olimpiadanyń ashylý saltanatyna qatysyp, búgin tańǵy ýaqytta elge oraldy.
"Jalpy alǵanda Olimpiada aýylynda barlyq jaǵdai jasalǵan, biraq árine, keremettei deýge de bolmaidy. Bastysy - sportshylarymyzdyń alańdamai, maqsatty túrde daiyndalýyna múmkindik bar", - dep atap ótti ministr.
Ministrdiń aitýynsha, Braziliiadaǵy ǵimarattar sán úshin emes, oiǵan qonymdy etip salynǵan. "Máselen Olimpiada aýylynda kreslolar emes, qarapaiym oryndyqtar tur. Biraq sportshylar úshin eń mańyzdy jaǵdai jasalǵan. Eń bastysy - qaýipsizdik bar. Bul - Braziliianyń bas aýyrtatyn máselesi", - dedi Qazaqstannyń mádeniet jáne sport ministri.
Ministrdiń aitýynsha, finaldyq oiyndar 13 tamyzda bastalady. Qazaqstandyq boksshylar, onyń aitýynsha, jaqsy nátije kórsetip jatyr. "Jeńilatletter de 13 tamyzdan bastap óner kórsetedi. Qazir eskek esý siiaqty sport túrinen otandastarymyz finaldyq kezeńge ótti. Qazir biz joǵary kórsetkishter kútemiz. Dziýdoshylarymyz Olimpiadaǵa birinshi ret qatysyp otyrsa da jaqsy nátije kórsetti - kúmis pen qola - bul jetkilikti", - dep esepteidi Arystanbek Muhamediuly.
Qazaqstandyq sportshylardyń qandai sport túrinen altyn medal alýy múmkin ekeni jaily suraqqa ministr óz úmitin aitty.
"Biz árine boksqa senip otyrmyz, aýyr atletikadan da medal kútip otyrmyz. Shynymdy aitaiyn, myna doping daýlary daiyndyǵymyzǵa úlken kedergi boldy. (...) Jalpy alǵanda bizdiń komanda jetilip keledi, dopingpen oinaýǵa bolmaityny endi sportshylar úshin de, barlyǵy úshin de úlken sabaq boldy", - dedi ministr.
