Arystaǵy qarý-jaraq qoimasynda bolǵan jarylystan keiin týyndaǵan tótenshe jaǵdaidyń saldaryn joiýǵa Úndistan, BAÁ, AQSh siiaqty elder aqysyz negizde kómek kórsetken, dep habarlaidy QazAqparat.
Bul týraly Qorǵanys ministriniń orynbasary Timýr Dándibaev ortalyq kommýnikatsiialar qyzmetinde ótip jatqan baspasóz máslihatynda aitty.
«Shynymen de bizdiń áriptester Arys qalasyndaǵy oqiǵadan keiin úlken kómek kórsetti. Bárinen buryn Resei Federatsiiasy men Tájikstan Respýblikasynyń birden bailanysqa shyǵyp, óz mamandaryn konsýltativtik kómek kórsetýge jiberdi. Sondai-aq, AQSh Qorǵanys ministrliginiń mamandary da baǵa jetpeitin úlken jumys atqardy. Qarýly kúshterdiń minadan tazartý ortalyǵyna aqysyz negizde saperlik qurylǵylar, oqý-jattyǵý keskinderin, ózge de qurylǵylar men qondyrǵylar berdi. Ol quraldar búginge deiin mamandardy daiyndaýǵa qoldanylyp júr. Odan bólek konsýltativtik sipatta úlken kómek kórsetti. Naqty aitsaq, tótenshe jaǵdai saldaryn joiýǵa tartylǵan bizdiń saperler men mamandardyń áreketin baǵalaý boiynsha kómektesti», - dedi ministrdiń orynbasary.
Aqysyz negizde qondyrǵy berý jaǵynan Úndistan men Birikken Arab Ámirlikteri de tartynyp qalmaǵan.
«Birikken Arab Ámirlikteri 43 mln teńgeden astam qarajatqa qondyrǵylar berdi. Úndistannyń qorǵanys vedomstvosy aqysyz negizde jarylystan qorǵaityn kostiýmder berdi. Bul kómekterdiń bári qajettiligi boiynsha baǵyttaldy. Sheteldik mamandar bizdiń mamandardyń tótenshe jaǵdai saldaryn joiý jáne oǵan deiingi kezeńde atqarǵan áreketteri men sheshimderin joǵary baǵalaǵanyn aitqym keledi», - dedi Timýr Dándibaev.
