Arys qalasynda áskeri poligondaǵy jarylystyń soqqy tolqynynan zaqymdalǵan úilerdi qalpyna keltirý jumystary bastaldy. Búgingi tańda 247 jeke úi jóndelýde, dep habarlaidy "Ult aqparat" QR Indýstriia jáne infraqurylymdyq damý ministrligine silteme jasap.
Ótken aptada Qazaqstan Respýblikasy Indýstriia jáne infraqurylymdyq damý ministrliginiń Qurylys jáne turǵyn úi-kommýnaldyq sharýashylyq isteri komitetiniń birinshi vitse-ministri Qaiyrbek Óskenbaev bastaǵan jumys toby tehnikalyq tekserý júrgizip, Arys qalasynda úilerdiń, ǵimarattar men qurylystardyń zaqymdaný dárejesin anyqtady.
Sapar barysynda komitet basshylyǵy men mamandarynan quralǵan komissiia Arys qalasyndaǵy barlyq úidiń 85% jóndeý jáne qalpyna keltirýdi talap etetinin anyqtady. 752 jumysshynyń qatysýymen 80-nen astam qurylys kompaniiasy jóndeý jumystaryn bastady.
Elbasynyń jáne Memleket basshysynyń tapsyrmasy boiynsha barlyq búlingen jáne buzylǵan obektiler 2019 jyldyń 1 tamyzyna deiin qalpyna keltirilýi tiis.
Esterińizge sala keteiik, Túrkistan oblysynyń ákimdigi Arysty 17 sektorǵa bóldi. Osylaisha, eldiń árbir aimaǵy jáne respýblikalyq mańyzy bar qalalar bekitilgen ýchaskelerge qurylysshylar brigadasyn jiberip, qalany qalpyna keltirýge qatysady.
