Jarylys bolǵan Arys qalasynda órt tolyq sóndirilgen. Bul týraly Túrkistan oblysynda qurylǵan jedel shtabta QR Qorǵanys ministriniń orynbasary Baqyt Qurmanbaev málimdedi, dep habarlaidy QazAqparat.
Arystaǵy tótenshe jaǵdaidan keiingi atqarylǵan jumystar men qalanyń qazirgi jai-kúiin baiandaǵan Qorǵanys ministriniń orynbasary órt sóndirý sharalaryna da toqtalyp ótti.
«Qaladaǵy negizgi kósheler men alańdardyń bári tekserilip, tazalandy. Bizdiń saper mamandarymyz 500-dei snariad qaldyǵy men jarylǵysh zattardy taýyp, zalalsyzdandyrdy. Qorǵanys ministrligi tarapynan turǵyndardyń qaýipsizdigin saqtaý baǵytynda tiisti sharalar atqarylýda. Endi biz qaladaǵy barlyq úidiń aýlasyn tolyq tekseremiz. Dál qazir qalaǵa eshkimdi kirgize almaimyz. Buǵan turǵyndardyń túsinistikpen qaraýyn ótinemiz. Arystyqtardyń qaýipsizdigi basty nazarda bolýy tiis» dedi Baqyt Qurmanbaev.
Óz kezeginde Tótenshe jaǵdailar jónindegi komitet tóraǵasy Vladimir Bekker qaýip bulty seiilgenin, alańdaýǵa negiz joq ekenin jetkizdi.
«Keibir aqparat quraldarynda adamdar iz-tússiz joǵaldy degen aqparat tarady. Bul negizsiz ekenin málimdeimin. Bastapqyda kóshý barysynda turǵyndar bir-birine habarlasa almai, qiyndyqtar kezdesken bolatyn. Qazir ol másele sheshilip, týystar da, balalar da tabylyp jatyr. Sonymen birge áleýmettik jelilerdegi iri jarylys bolatyny, qoimalardan sý jiberiletini týraly qaýesetter de jalǵan. Qazirgi tańda oblystaǵy sý qoimalary turaqty rejimde jumys istep tur jáne ol jumys rejimin ózgertý týraly jospar joq. Sondyqtan resmi rastalǵan derekterge ǵana senýlerińizdi suranamyz» dedi Vladimir Bekker.
