Bala quqyqtary jónindegi ýákil Arýjan Sain Sátbaevtaǵy oqiǵaǵa aralasyp, balanyń anasymen jáne jaýapty organdardyń basshylarymen bailanysta otyrǵanyn málim etti, dep habarlaidy "Ult aqparat".
«Dostar! Men Sátbaevtaǵy oqiǵa boiynsha balanyń anasymen telefon arqyly sóilesip otyrmyn. Sot-meditsinalyq saraptama júrgizildi. Biz ári qarai júrgiziletin jumystar, zańgerlik, psihologiialyq kómek kórsetý týraly áńgimelestik. Bala quqyǵy jónindegi ýákil retinde men bul isti barlyq baǵyt boiynsha júrgizemin», - dep jazdy Arýjan Sain Facebook paraqshasynda.
Arýjan Sain sonymen qatar Ishki ister ministri Erlan Turǵymbaevpen jáne Qaraǵandy oblysy ákiminiń orynbasary Abzal Núkenovpen sóileskenin jetkizdi.
«Men bul otbasyny osy ispen ainalysatyn iývenaldy advokatpen bailanystyrýdy ótindim. Sondai-aq myqty psiholog maman da aiqyndaldy. Sebebi balalarǵa qatysty qylmystardy tergeý barysynda psihologtyń qatysýy mindetti. Balalarǵa jasalǵan seksýaldy zorlyq boiynsha qylmystyq isterdi júrgizip jatqanymyzǵa birneshe jyl boldy. Balalarǵa qarsy osyndai qylmys jasaityn ár adamnyń jazalanýyna barynsha kúsh salamyz», - deidi ol.
Eske sala ketsek, búgin Ishki ister ministri Erlan Turǵymbaev Sátbaevtaǵy bes jasar qyz balanyń joǵalýyna qatysty oqiǵanyń mán-jaiyn aityp bergen bolatyn.
«23 shilde kúni keshki saǵat 9-da Sátbaev qalasynyń ishki ister basqarmasyna 5 jasar qyzdyń joǵalǵany týraly aryz tústi. Dereý izdestirý nátijesinde búldirshin qaladaǵy bir úiden tabyldy. Jas qyzdy zorlady degen kúdikpen bir azamat qamaýǵa alyndy. Biraq birneshe adam kúdiktini óz qolyna berýdi talap etti, janjal shyǵardy», - dedi Erlan Turǵymbaev OKQ-da ótken baspasóz máslihatynda.
Sondai-aq, búgin Prezident Shornaq aýyly men Sátbaev qalasyndaǵy jaǵdaiǵa bailanysty keńes ótkizdi.
