Bala quqyqtary jónindegi ýákil Arýjan Sain Almatydaǵy balalar úiiniń qyzmetkeri tárbielenýshini uryp-soǵyp jatqan video men sýretke qatysty túsinikteme berdi, dep habarlaidy QazAqparat.
Video Almatydaǵy «Januia» mamandandyrylǵan kesheninde túsirilgen.
«Keshe internette osy mekeme tárbielenýshileriniń anyq fizikalyq zorlyq-zombylyq pen kútimsizdik belgileri bar sýretteri men videolary taratyldy. Alaida, balalardyń maǵan usynylǵan videolarynda, olarda jaraqattyń, uryp-soǵýdyń izderi kórinbeidi. Balalar úiiniń qazirgi direktory memleket atynan mekeme tárbielenýshileriniń resmi qamqorshysy bolyp esepteledi. Bul video men fotolardy kim, qashan jáne qandai jaǵdaida túsirgenin anyqtaý úshin ol Almaty Politsiia departamentine jáne prokýratýraǵa júginýge mindetti. Men osy videony túsirgen qyzmetkerlerdiń nelikten politsiiaǵa ýaqytynda júginbegenin, óz mindetterin oryndamai, balalardyń quqyqtaryn qorǵamaǵanyn anyqtadym», - dedi Arýjan Sain.
Almaty qalasynyń prokýratýrasy Bala quqyqtary jónindegi ýákil Arýjan Sainniń bastamasymen osy ortalyqta tekseris júrgizdi. Tekseris barysynda kóptegen buzýshylyqtar anyqtaldy. Burynǵy basshylyq pen birqatar qyzmetkerlerge qatysty birneshe qylmystyq is tirkeldi.
Qala prokýratýrasy mekeme qyzmetkerleriniń jalaqysyn negizsiz artyq tóleý, taýarlyq-materialdyq qundylyqtardyń, onyń ishinde demeýshilik kómektiń jetispeýshiligi, mekeme úi-jailaryn aǵymdaǵy jóndeý boiynsha naqty oryndalmaǵan jumystarǵa aqy tóleý faktileri anyqtalǵanyn habarlady.
Tekserý materialdary boiynsha 58 mln teńge kóleminde biýdjet qarajatyn jymqyrý faktileri boiynsha qylmystyq is qozǵaldy. Qazirgi ýaqytta Almaty qalasy boiynsha Ekonomikalyq tergeý departamenti Qazaqstan Respýblikasy Qylmystyq kodeksiniń 189-baby 3-bóligi 1-tarmaǵy boiynsha sotqa deiingi tergeý júrgizýde.
