Armiialyq halyqaralyq oiyndary aiasynda 40-shy «Otar» áskeri bazasynyń aýmaǵynda ótkiziletin «Artilleriiadan oq atý sheberleri» konkýrsyna qatysýshylar arasynda jerebe tastaý rásimi ótti, - dep habarlaidy Qorǵanys ministrliginiń baspasóz qyzmeti.
Atalmysh rásimge toǵyz elden kelgen komandalar ókilderi qatysty. Olar Ázerbaijan, Belarýs, Vetnam, Iran, Qazaqstan, Resei, Siriia, Tájikstan men Ózbekstan.
Jarystyń bas tóreshisi general-maior Asqar Jolamanovtyń basshylyǵymen minaatqysh eseptoptardyń komandirleri óz komandalarynyń jarysý kezegin jáne áskeri tehnikanyń túsin anyqtady. Qazaqstandyq komanda kók MT-LB (jeńil brondalǵan kópmaqsatty tartqysh) tehnikasynda synǵa túsedi.
Saiystyń birinshi «Jeke jarys» kezeńinde birinshi bolyp Qazaqstan, Resei, Siriia jáne Ózbekstan ókilderi shyǵady. Olardan keiin Ázerbaijan, Belarýs, Iran, Tájikstan Qarýly Kúshteriniń minaatqysh eseptoptary jáne baiqaýǵa alǵash qatysýshy – Vetnam eli jarysady.
Ár komandada eki minaatqysh eseptoby bolady. Konkýrs jeńimpazy «Jeke jarys», «Túngi sprint» jáne «Estafeta» jarystarynyń kezeńderinde komandanyń eki eseptobynyń alǵan upai sanymen anyqtalady. Upai sany teń bolǵan jaǵdaida sońǵy «Estafeta» kezeńindegi jarysta barynsha joǵary orynǵa ie bolǵan komandaǵa basymdyq beriledi.
Artilleriiashylar jarys bastalmas buryn tas jolmen, nysana alańdarymen tanysady, bailanys boiynsha praktikalyq sabaqtar men qoldanylatyn qarýdy muqiiat tekserýden ótkizedi.
Osy konkýrs 2021 jyldyń 25 tamyzynda bastalyp, 2 qyrkúiekke deiin jalǵasatyn bolady.
