"ArselorMittal Temirtaý" kásipornynda tórt adam qaza tapty, - dep habarlaidy "Ult aqparat" Qaraǵandy oblysy ákimdiginiń baspasóz qyzmetine silteme jasap.
"2022 jylǵy 10 maýsymda "Qurylysmet" JShS aýmaǵynda "ArselorMittal Temirtaý" AQ qyzmetkerlerimen jazataiym oqiǵa boldy. Otqa tózimdi kirpish qalaýyn bólshekteý kezinde usta-press tsehynyń № 9 jumys istemeitin termiialyq peshinde tóbe qulady. Pesh kúmbeziniń qulaýy nátijesinde (kólemi 5h5h10 m) úiindilerdiń astynda bes adam qaldy. Olardyń tórteýi qaza boldy, bireýi - 1994 jyly týǵan er adam aýrýhanaǵa jetkizildi", - delingen habarlamada.
Ákimdik aqparatyna qaraǵanda, qazirgi ýaqytta Qaraǵandy oblysy TJD qutqarýshylary (27 adam jáne 7 birlik tehnika) jáne "Seriktes Órt Sóndirýshi" JShS qyzmetkerleri (10 adam jáne 2 birlik tehnika) úiindilerdi ashyp jatyr.
Oqiǵa ornynda Qaraǵandy oblysynyń ákimi Jeńis Qasymbek, TJD jáne ónerkásiptik qaýipsizdik basshylary bar.
QR Eńbek kodeksiniń talaptaryna sáikes eńbek jónindegi ýákiletti organnyń ókimimen komissiia qurylady jáne jazataiym oqiǵaǵa arnaiy tekserý júrgiziledi. Nátijeler týraly qosymsha habarlanatyny aityldy.
