Aqyn Aron Atabek jansaqtaý bóliminde jatyr. Aqparatty onyń ápkesi Raziia Nýtýsheva rastady, - dep habarlaidy Tengrinews.kz.
Onyń aitýynsha, Aron Atabek qazir Almatydaǵy jeke klinikalardyń birinde jatyr.
"Iá, ol shynymen, aýrýhanaǵa jatqyzyldy. Qai aýrýhana ekenin aita almaimyz, ol jeke klinikada. Jaǵdaiy onsha emes, óitkeni jansaqtaý bóliminde jatyr", - dedi Atabektiń ápkesi.
Eske salaiyq, 1 qazanda Pavlodar qalasy №2 sotynda Aron Atabekke qatysty onyń naýqastanýyna bailanysty bas bostandyǵynan aiyrý jazasynyń ótelmegen bóligin neǵurlym jeńil jazanyń túrine aýystyrý týraly usynysy qaralyp, ol bostandyqqa shyqqan bolatyn. Biraq úiine shyqqannan keiin onyń densaýlyǵy nasharlap ketken.
2007 jyly Aron Atabek Almatydaǵy Shańyraq yqshamaýdanyndaǵy oqiǵadan keiin 18 jylǵa sottalǵan bolatyn. 14 jyl buryn bolǵan oqiǵa kezinde jergilikti turǵyndar men politseiler qaqtyǵysyp, saldarynan 28 politsei zardap shegip, bireýi qaitys bolǵan edi.
