Maýsym aiynan bastap Armeniia Respýblikasynan Qazaqstanǵa ákelingen kólikterdi tirkeý bastalady. Osyǵan orai Qazaqstan Respýblikasy Ishki ister ministrligi Ákimshilik politsiia komiteti tóraǵasynyń orynbasary Serik Túsipov osy jaitqa qatysty eń negizgi saýaldarǵa jaýap berdi, dep habarlaidy "Ult aqparat".
«Basqarý organdary sol jaqta ornalasqan, Armeniia Respýblikasynyń ýákiletti organdarynda Qazaqstan azamattaryna tirkelgen jáne olar Qazaqstanǵa 2020 jylǵy 1 aqpanǵa deiin ákelgen avtomobilder tirkeýge jatady (Qazaqstan Respýblikasy Úkimetiniń aǵymdaǵy jylǵy 20 mamyrdaǵy№ 306 qaýlysy). Qabyldanǵan qaýly aiasynda (2020 jylǵy 20 mamyrdaǵy № 306), avtomobildi tirkeý quny 11 946 teńgeni quraidy. Oǵan 695 teńge (0,25 AEK)– tirkeý úshin alym, 3 773 teńge (1,25 AEK)–tehpasport úshin baj, 7 778 teńge (2,8 AEK)– memnómir úshin baj kiredi. Basqa tólemder kózdelmegen», - dedi Serik Túsipov.
Osy oraida ol Armeniiadan ákelingen kólikterge nelikten sary nómir beriletindigini túsindirdi.
«Ákelingen avtomobilderdi olardyń menshik ieleri Armeniia esebinen shyǵarmaǵandyqtan, Qazaqstanda tirkeý kezinde olarǵa sary fondaǵy nómirler beriletin bolady. Óitkeni, olar - basqa memlekette turaqty tirkeýde turǵan kólik quraldary. Bul rette, nómirler avtomobildiń menshik iesiniń naqty turatyn jeri boiynsha óńirdiń kodymen («01» óńirden bastap «17» deiin) beriletin bolady», - dedi ol.
Sonymen qatar, QR IIM ókili nelikten «oń jaq rýldi» jáne qaita jabdyqtalǵan avtomobilderdi tirkeýge bolmaityndyǵyn túsindirdi.
«Oń jaq rýldi» avtomashinalardy tirkeý kózdelmeidi, óitkeni 2009 jyldan bastap oǵan tyiym salynǵan. Tyiym salý «Jol júrisi týraly» Zańda jáne «Dóńgelekti kólik quraldarynyń qaýipsizdigi týraly» Keden odaǵynyń Tehnikalyq reglamentinde belgilengen nómiri «Oń jaq rýldi» avtomobilder bastapqyda sol jaqty qozǵalysy bar elderde - Japoniia, Ulybritaniia jáne t.b. paidalaný úshin konstrýktivti túrde jasalǵan. Atalǵan avtomobilderdi oń jaqty qozǵalysy bar joldarda aidaý kezinde, júrgizýshilerdiń kórý buryshy shekteýli bolǵandyqtan basyp ozý, solǵa burylý jáne t.b. manevrler qaýipsiz jasaýdy qiyndatady. Basqarý organdary oń jaqtan sol jaqqa ornalastyrylyp qaita jabdyqtalǵan avtomobildermenshik iesi kólik quraly konstrýktsiiasynyń qaýipsizdigi týraly kýálik usynǵannan keiin ǵana tirkeýge jatady. Kólik quraly konstrýktsiiasynyń qaýipsizdigi týraly kýálikti Saýda jáne integratsiia ministrligi akkredittegen synaq zerthanalary beredi», - dedi Serik Túsipov.
Munan bólek ol Armeniiada berilgen tehpasport pen memnómirler qaida saqtalatynyn, olardy qaitaryp alý qalai júzege asyrylatynyn túsindirdi.
«Armeniiada berilgen tehpasport pen memnómirler avtomobildi Qazaqstanda tirkegen kezde Mamandandyrylǵan HQKO-larda tapsyrylatyn jáne avtomobildiń menshik iesi talap etkenge deiin muraǵattarda saqtalady. Olardy qaitarý avtomobildi Qazaqstannyń tirkeý esebinen shyǵarǵan jaǵdaida, menshik ieleriniń suraý salýy boiynsha júzege asyrylady», - dedi ol.
S.Túsipov Armeniiadan ákelingen jáne Qazaqstanda osy jylǵy 1 maýsym men 1 qyrkúiek aralyǵynda tirkelgen avtomobildi odan ári qaita satý úshin ne qajet ekendigin de túsindirdi.
«Tirkelgen avtomobilderdi paidalaný merzimi shektelmegen. Avtomobildiń menshik iesi ony paidalaný merzimderi týraly sheshimdi ózi qabyldaýǵa quqyly. Eger azamat óz avtomashinasyn qaita satqysy kelse, ol: «qazaqstandyq» memnómirler men tehpasporttardy tapsyrýmen avtomobildi Qazaqstannyń esebinen shyǵarýǵa; mamandyrylǵan HQKO-da «armiandyq» nómirleri men tehpasportty qaityp alýǵa tiis; Armeniia esebinen shyǵarý, ol úshin qazirgi tańda «óziniń barýy qajettigi» kózdelgen; Qazaqstanniń zańnamasynda kózdelgen (kedendik baj, bastapqy tirkeý jáne kádege jaratý alymy) tólemderin tóleý. Osydan keiin, ol avtomobildi basqa tulǵaǵa qaita sata alady», - dep túsindiredi ol.
