Qazaqstan Elshisi Bolat Imanbaev Armeniia Prezidenti Armen Sarkisianǵa senim gramotalaryn tapsyrdy. Bul týraly elimizdiń Syrtqy ister ministrligi habarlady.
Saltanatty rásimnen keiin ótken kezdesý barysynda taraptar saýda-ekonomikalyq jáne mádeni-gýmanitarlyq ózara is-qimyldy keńeitý qajettiligine basa nazar aýdara otyryp, yntymaqtastyqtyń basym baǵyttaryn egjei-tegjeili talqylady.
«COVID-19 pandemiiasynan týyndaǵan qolaisyz jaǵdaiǵa qaramastan, 2020 jyly eki ese ósken saýdanyń oń dinamikasyna ózara qanaǵattaný baiqaldy. Iskerlik bailanystardy damytý jáne investitsiialar, qarjy jáne joǵary tehnologiialar salalarynda birlesken jobalardy ázirleý boiynsha birlesken kúsh-jigerdi jalǵastyrýdyń mańyzdylyǵy atap ótildi. Aǵymdaǵy jyly saýda-ekonomikalyq yntymaqtastyq jónindegi birlesken úkimetaralyq komissiianyń otyrysyn ótkizý jónindegi josparlar talqylandy», - delingen aqparatta.
Sondai-aq Elshi Prezident Qasym-Jomart Toqaevtyń eldi odan ári demokratiialandyrýǵa baǵyttalǵan jańa reformalarymen, ekonomikalyq jańǵyrtýdyń ózekti baǵdarlamalarymen jáne Qazaqstannyń halyqaralyq bastamalarymen tanystyrǵan. Óz kezeginde «Armeniia Prezidenti elimizdiń jetistikterine, sondai-aq Q. Toqaevtyń bastamasymen qolǵa alynǵan saiasi reformalarǵa joǵary baǵa berdi. A. Sarkisian qazaqstandyq qoǵamnyń birligi men ulttyq kelisim modeliniń biregeiligin jáne Qazaqstannyń Tuńǵysh Prezidenti – Elbasy Nursultan Nazarbaevtyń ony tabysty iske asyrýdaǵy negizgi rólin erekshe atap ótti. Halyqaralyq saiasi dialogtyń senimdi deńgeiin jáne qolda bar áleýet pen qos ózara is-qimyldyń keleshegin atap ótip, ol sondai-aq Qazaqstan basshylyǵyna óziniń izgi tilekterin jetkizýdi surady.
Áńgime sońynda A. Sarkisian Elshini qyzmetine resmi kirisýimen quttyqtap, diplomatiialyq missiiasyn iske asyrý isinde tabys tiledi», - dedi QR SIM-nen.
