Armeniia Ázerbaijan ústinen BUU-daǵy Halyqaralyq sotqa shaǵym túsirdi. Erevan Bakýdy jyldar boiy Armeniia azamattary men etnikalyq armiandardyń quqyǵyn óreskel buzdy dep aiyptady. Bul týraly Azattyq agenttigi habarlady.
Halyqaralyq sottyń málimetine qaraǵanda, shaǵym iesi Armeniiaǵa "qastyq saiasatyn júrgizgen" Ázerbaijan "armiandardy násildik turǵyda alalady" dep tujyrymdaǵan. Erevannyń pikirinshe, sonyń saldarynan "armiandar júieli túrde diskriminatsiiaǵa ushyraǵan, jappai azaptalyp óltirilgen, ózge de kemsitýshilikterge ushyraǵan".
Armeniianyń pikirinshe, "armian ulty men tegine" qarsy baǵyttalǵan Bakýdiń áreketi 2020 jyly qyrkúiekte Taýly Qarabaqta jaǵdai ýshyqqan kezde qaita jandanǵan.
Armeniia shaǵymda "qarýly qaqtyǵys kezinde Ázerbaijan násildik alalaýdyń barlyq túrimen kúres týraly halyqaralyq konventsiia sharttaryn óreskel buzdy" dep aiyptaǵan.
Resmi Erevan "tipti soǵys aiaqtalǵannan keiin" iaǵni, 2020 jyly 10 qarashada atysty toqtatý týraly kelisim kúshine engennen keiin de Ázerbaijan "armian tutqyndary men ustalǵandardy óltirip, azaptaýdy, qorlaýdy" jalǵastyrǵan.
Ázerbaijan syrtqy ister ministrligi ókili Baký "barynsha qorǵanyp", Armeniiany dál solai aiyptap, qarsy shaǵym túsiretinin aitty.
Taýly Qarabaqtaǵy soǵystan keiin Ázerbaijan men Armeniia arasyndaǵy jaǵdai áli ýshyǵyp tur. Byltyr alty aptaǵa sozylǵan soǵys keminde 6900 adamnyń ómirin qidy. 2020 jyly qarasha aiynda taraptar Máskeýdiń araaǵaiyndyq etýimen atysty toqtatý týraly kelisimge qol qoidy. Kelisimge sáikes, Armeniia Taýly Qarabaqtaǵy birneshe aýdandy Ázerbaijanǵa qaitarǵan.
Eki el arasyndaǵy atysty toqtatý týraly kelisim jáne Armeniianyń is júzinde soǵysta jeńilýi elde saiasi daǵdarysqa alyp kelgen.
