Qostanai oblysynyń ákimi Arhimed Muhambetov Fedorovskii aýdanyna barǵan jumys sapary kezinde 103 jastaǵy turǵyn Ganimýrýi Iýldashevany merekemen quttyqtady, dep habarlaidy "Ult aqparat" óńir basshysynyń Instagram paraqshasyna silteme jasap.
«Keshe sapar barysynda 2020 jyldyń 31 jeltoqsanynda 103 jasqa tolǵan Fedorovka aýylynyń turǵyny Iýldasheva Ganimýrýi hanymdy kóktem merekesi – Halyqaralyq áielder kúnimen quttyqtadym. Jeti balany ósirip, ǵumyryn temirjoldaǵy jumysqa arnaǵan Ganimýrýi apai jasy ulǵaiǵanyna qaramastan kúsh-qýaty tasyp tur, mereke aldynda bizdiń quttyqtaýymyzdy qýana qabyldady», - dep atap ótti ákim óziniń postynda.
Sondai-aq ákim issapar kezinde arnaiy áleýmettik qyzmet kórsetetin Peshkovskii ortalyǵyna bardy.
«Jańa monsha-kir jýý kesheniniń qurylys jobasymen tanysyp, kelýshilerge azyq-túlik alýǵa, onyń ishinde et, ósimdik maiy, makaron jáne jarma, sondai-aq konditerlik ónimder, sheker, jemis-jidek pen kókónis, sýsyn alýǵa arnalǵan, jalpy somasy 2 000 000 teńge bolatyn sertifikattar tabystadym», - delingen habarlamada.
Arhimed Muhambetov mundai bastamany basqa óńirlerde de jalǵastyrý týraly usynys aitty.
