Almaty oblysyndaǵy Arqarly petroglifterin saqtap qalý jumystary qolǵa alyna bastady, dep habarlaidy "Ult aqparat".
Mamandar bes kún boiy Álkei Marǵulan atyndaǵy arheologiia institýtynyń ǵalymdary Arqarly asýyn zerttep, tańbaly tastar men obalardy, myńdaǵan jyl burynǵy qonystardy tirkep, qaǵaz betine túsirdi.
Arheolog, ekspeditsiia jetekshisi Aleksandr Goriachev aitýynsha bul jerde petroglifterdiń aýqymdy segiz kesheni bar. Onyń bireýi tas óndirýshiler kásibinen ábden zardap shekken. Al keshenniń ár qaisysynyń tarihi qundylyǵy óte joǵary.
«Bir keshenniń ózinde alýan kompozitsiiasy bar 150-dei tas kórdik. Al ár tasta keminde bes tańba bar desek, eki keshenniń ózinen myńdaǵan sýret sanap shyǵýǵa bolady. Bul tek bizdiń aiaǵymyz jetken jerler. Áli zerttelmegen dúnie óte kóp»,- dedi Aleksandr Goriachev.
Arheologtar munan bólek birneshe dáýirdiń izi qalǵan júzdegen oba men qorǵandardyń ornyn tapty. Biraq qazirdiń ózinde obalar jabaiy kózine túsip, talan-tarajǵa túse me dep alańdaýly.
«Rýhani jańǵyrý baǵdarlamasy tek qaǵaz júzinde emes, osyndai istermen júzege asý kerek. Bul tańbaly tastar bizdiń mádeni muramyz, tarihymyz. Sondyqtan baǵdarlamany osy tarihi eskertkishti qorǵaý jumystaryna baǵyttaý kerek dep oilaimyn»,- dedi ekspeditsiia múshesi Olga Gýmirova.
Jergilikti atqarýshy bilik kásiporyndardyń tas buzýyn toqtatqan. Biraq munymen másele sheshilmek emes. Ǵalymdar tańbaly tastardyń tólqujatyn jasap, bárin tirkeýge alý kerek. Sonda ǵana tarihi jádigerler zańdy túrde qorǵalmaq.
«Qujattandyrý jumystaryn aiaqtaǵannan keiin ol jerde qorǵaý aimaǵy belgili bolady. Qorǵaý aimaǵynda qansha jerdi qorshaý kerek ekendigine joba shyǵaramyzda biýdjetten aqsha bólingennen keiin ol jerdi qorshaimyz»,- dedi Almaty oblystyq tarihi-mádeni murany qorǵaý ortalyǵynyń direktory Ǵalymjan Ospanov.
Dál qazir biýdjette bul baǵytqa qarjy qarastyrylmaǵan. Oblystyq máslihatqa da endi usynylmaq. Al Almaty oblysy aýmaǵynda áli zerttelmegen tańbaly tastar óte kóp.
Aita keteiik, Almaty oblysyndaǵy Arqarly petroglifteri óńirdegi qundy tarihi jádigerler jatqan aýqymdy keshen. Taý shatqaldarynda áli zerttelmegen, ári esh jerde tirkelmegen tańbaly tastar óte kóp. Alaida sońǵy jyldary qiyrshyq tas óndiretin kásiporyndar osy tarihi qundylyqtardy buzyp, búldirip, aiaq asty etip jatyr. Másele kóterilip, arheologtar da dabyl qaqqannan keiin tarihi jádigerlerdi saqtap qalý jumystary qolǵa alyna bastady.
