Árbir sheneýnik halyq úshin jumys isteitindigimizdi este ustaýy tiis. Bul týraly búgin Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev aitty, dep habarlaidy "Ult aqparat".
«Biz biýdjet qyzmetkerleriniń eńbekaqysyn birtindep arttyryp kelemiz. Bul ustazdar qaýymyna, dárigerlerge jáne mádeniet salasy mamandaryna qatysty. Mysaly, kelesi jyldan bastap muǵalimderdiń jalaqysy 25 paiyzǵa ósedi, al jalpy 4 jyl ishinde olardyń jalaqysy 2 esege artady. Kópbalaly otbasylar, zeinetkerler, múmkindigi shekteýli jandar árdaiym memlekettiń qamqorlyǵynda bolady. Biz áleýmettik memleket ekenimizdi eshqashan esten shyǵarmaimyz», - dedi Qazaqstan Prezidenti.
Memleket basshysynyń atap ótýinshe, ózgege qoldaý kórsetip, qol ushyn berý, kómektesý - halqymyzdyń qanyna sińgen qasiet. Bul - bizdiń ulttyq kodymyzda bar nárse.
«Árbir sheneýnik bizdiń halyqtyń bólshegi ekendigimizdi, halyq úshin jáne halyqtyń arasynda jumys isteitindigimizdi este ustaýy tiis. Estitin memleket – bul biýrokratiianyń eń nashar kórinisteriniń de bolmaýy jáne tsifrlandyrý negizinde barlyq protsedýralardyń ashyqtyǵy. Memlekettik bilik júiesine basqarýshylardyń jańa tolqynyn tartý qajet», - dedi Qasym-Jomart Toqaev.
Qasym-Jomart Kemeluly bul baǵytta alǵashqy qadamnyń jasalyp, prezidenttik jastar kadr rezervi jasaqtalyp jatqanyn eske saldy.
«Jas kásibi mamandar memlekettik basqarý júiesiniń jaýapty ýchaskelerine jiberiledi», - dedi Memleket basshysy.
