Aqtóbe oblysynda mas kúiinde kólik júrgizgeni úshin sottalǵan 33 jastaǵy er adam ýaqytsha ustaý izoliatorynan qashyp ketti. Ol ǵimarattyń shatyryna shyǵyp, tikenek symnan asyp ótken. Alaida bostandyqta uzaq júre almady, dep habarlaidy ult.kz.
«Diapazon» málimetinshe, Qarǵaly aýdanynyń turǵyny buǵan deiin kólik júrgizý quqyǵynan aiyrylǵan. Soǵan qaramastan, ol qaitadan mas kúiinde rólge otyrǵan. Sot oǵan bas bostandyǵynan aiyrý jazasyn taǵaiyndaǵan.
Úkim shyqqannan birneshe kún ótken soń er adam Badamsha aýylyndaǵy Qarǵaly aýdandyq politsiia bóliminiń ÝUI-dan qashqan.
Sot materialdaryna sáikes, keshki serýen kezinde ol aýla esigindegi aspaly qulypty ashyp, basqa aýlaǵa ótken. Keiin qabyrǵadan shyǵyp turǵan ulýtas bóligin iterip, armatýrany syndyryp, shatyrǵa kóterilgen. Osydan soń tikenek symnan asyp, izoliator aýmaǵynan shyǵyp ketken.
Er adam Kempirsai aýylyna qarai jaiaý bet alyp, keiin Aqtóbege bara jatqan kólikke otyrǵan. Alaida qalaǵa jete almady. Politsiia ony sol kúni ustady.
Sotta sottalǵan adam kinásin tolyq moiyndady.
Qashqany úshin ol QR Qylmystyq kodeksiniń 426-baby boiynsha 1,5 jylǵa bas bostandyǵynan aiyryldy. Buǵan qosa, aldyńǵy úkim boiynsha ótelmegen jaza merzimi eskerilip, túpkilikti 2 jylǵa bas bostandyǵynan aiyrý jazasy taǵaiyndaldy.
