Aqtóbe oblysynda 2025–2028 jyldarǵa arnalǵan «Bolashaqqa – saý tispen» Jol kartasyn iske asyrý jalǵasýda. Joba aiasynda mektepterde stomatologiialyq kabinetter ashylyp, aýyz qýysy aýrýlarynyń aldyn alý jáne olardy erte kezeńde anyqtaý jumystary oqýshylardyń bilim alatyn jerinde júrgizilýde, dep habarlaidy ult.kz.
Jalpy oblys boiynsha oqýshy sany 1000-nan asatyn 59 mektepte stomatologiialyq kabinet ashý josparlanǵan.
2025 jyly mundai kabinetter 14 mektepte ashyldy: onyń 12-si - Aqtóbe qalasynda, 2-eýi - aýdan ortalyqtarynda ornalasqan. 2026 jyly taǵy 15 kabinet ashý josparlanýda. Onyń ishinde 12-si Aqtóbe qalasyndaǵy, 3-eýi aýdan ortalyqtaryndaǵy mektepterde ashylady.
Jyl basynan beri 7 847 oqýshy profilaktikalyq stomatologiialyq tekserýden ótken. 1 719 baladan jeńil jáne ortasha dárejedegi karies anyqtalypty. Stomatologiialyq máseleler anyqtalǵan jaǵdaida balalarǵa qajetti meditsinalyq súiemeldeý kórsetilip, ári qarai em alý boiynsha usynymdar beriledi.
Osyndai kabinetterdiń biri byltyrǵy jyldan beri Aqtóbe qalasyndaǵy №56 mektepte jumys isteidi.
«Balanyń densaýlyǵy tisten bastalady. Byltyrdan beri mektebimizde stomatologiialyq kabinet jumys isteidi. Ótken oqý jylynda mekteptegi tis dárigeri 2 265 oqýshyny tekserýden ótkizdi. Balalardyń tisin julmaidy, tek súiemeldeidi, qajet bolǵan jaǵdaida dárigerlerge joldama beriledi. Sonymen qatar stomatolog klastarda tisti durys tazalaý jáne aýyz qýysyna kútim jasaý týraly dárister ótkizedi. Munyń barlyǵy balalar arasynda aýyz qýysy men tis aýrýlarynyń aldyn alýǵa baǵyttalǵan. Stomatologiialyq kabinettiń barlyq qajetti qural-jabdyǵyn №3 KDP qamtamasyz etedi. Meniń oiymsha, bul óte mańyzdy jumys. Sebebi barlyǵy óskeleń urpaqtyń deni saý bolýy úshin jasalyp otyr», — dedi Aqtóbe qalasyndaǵy №56 mekteptiń direktory Gúlnara Narymbetova.
Mektepterdegi stomatologiialyq kabinetterdiń negizgi jumysy — aýrýlardyń aldyn alý jáne olardy erte kezeńde anyqtaý. Jyl saiyn oqýshylardyń aýyz qýysyna jappai tekserý júrgizilip, onyń qorytyndysy boiynsha qosymsha baqylaýdy nemese emdi qajet etetin balalardyń tizimi jasalady.
Balalardyń boiynda durys ádet qalyptastyrýǵa da erekshe kóńil bólinedi. Stomatologtar profilaktikalyq sabaqtar ótkizip, oqýshylarǵa tisti durys tazalaý, ony qanshalyqty jii tazalaý kerektigin, sondai-aq tis shetkasy men pastasyn durys tańdaý joldaryn túsindiredi.
Kabinetterde balalar dáriger-stomatologtary nemese dantister jumys isteidi. Sonymen qatar meditsinalyq meiirbikeler protsedýralardy júrgizýge kómektesip, quraldardy zararsyzdandyrý jumystaryn atqarady.
Osylaisha, mektep stomatologiiasy oblysta karies pen basqa da aýrýlardy erte anyqtaýdyń ǵana emes, sonymen qatar aýyz qýysyna kútim jasaý mádenietin bala kezden qalyptastyrýǵa baǵyttalǵan júieli profilaktikalyq jumystyń mańyzdy bóligine ainalyp keledi.
