اقتٶبە وبلىسىندا 2025–2028 جىلدارعا ارنالعان «بولاشاققا – ساۋ تٸسپەن» جول كارتاسىن ٸسكە اسىرۋ جالعاسۋدا. جوبا اياسىندا مەكتەپتەردە ستوماتولوگييالىق كابينەتتەر اشىلىپ, اۋىز قۋىسى اۋرۋلارىنىڭ الدىن الۋ جەنە ولاردى ەرتە كەزەڭدە انىقتاۋ جۇمىستارى وقۋشىلاردىڭ بٸلٸم الاتىن جەرٸندە جٷرگٸزٸلۋدە, دەپ حابارلايدى ult.kz.
جالپى وبلىس بويىنشا وقۋشى سانى 1000-نان اساتىن 59 مەكتەپتە ستوماتولوگييالىق كابينەت اشۋ جوسپارلانعان.
2025 جىلى مۇنداي كابينەتتەر 14 مەكتەپتە اشىلدى: ونىڭ 12-سٸ - اقتٶبە قالاسىندا, 2-ەۋٸ - اۋدان ورتالىقتارىندا ورنالاسقان. 2026 جىلى تاعى 15 كابينەت اشۋ جوسپارلانۋدا. ونىڭ ٸشٸندە 12-سٸ اقتٶبە قالاسىنداعى, 3-ەۋٸ اۋدان ورتالىقتارىنداعى مەكتەپتەردە اشىلادى.
جىل باسىنان بەرٸ 7 847 وقۋشى پروفيلاكتيكالىق ستوماتولوگييالىق تەكسەرۋدەن ٶتكەن. 1 719 بالادان جەڭٸل جەنە ورتاشا دەرەجەدەگٸ كاريەس انىقتالىپتى. ستوماتولوگييالىق مەسەلەلەر انىقتالعان جاعدايدا بالالارعا قاجەتتٸ مەديتسينالىق سٷيەمەلدەۋ كٶرسەتٸلٸپ, ەرٸ قاراي ەم الۋ بويىنشا ۇسىنىمدار بەرٸلەدٸ.
وسىنداي كابينەتتەردٸڭ بٸرٸ بىلتىرعى جىلدان بەرٸ اقتٶبە قالاسىنداعى №56 مەكتەپتە جۇمىس ٸستەيدٸ.
«بالانىڭ دەنساۋلىعى تٸستەن باستالادى. بىلتىردان بەرٸ مەكتەبٸمٸزدە ستوماتولوگييالىق كابينەت جۇمىس ٸستەيدٸ. ٶتكەن وقۋ جىلىندا مەكتەپتەگٸ تٸس دەرٸگەرٸ 2 265 وقۋشىنى تەكسەرۋدەن ٶتكٸزدٸ. بالالاردىڭ تٸسٸن جۇلمايدى, تەك سٷيەمەلدەيدٸ, قاجەت بولعان جاعدايدا دەرٸگەرلەرگە جولداما بەرٸلەدٸ. سونىمەن قاتار ستوماتولوگ كلاستاردا تٸستٸ دۇرىس تازالاۋ جەنە اۋىز قۋىسىنا كٷتٸم جاساۋ تۋرالى دەرٸستەر ٶتكٸزەدٸ. مۇنىڭ بارلىعى بالالار اراسىندا اۋىز قۋىسى مەن تٸس اۋرۋلارىنىڭ الدىن الۋعا باعىتتالعان. ستوماتولوگييالىق كابينەتتٸڭ بارلىق قاجەتتٸ قۇرال-جابدىعىن №3 كدپ قامتاماسىز ەتەدٸ. مەنٸڭ ويىمشا, بۇل ٶتە ماڭىزدى جۇمىس. سەبەبٸ بارلىعى ٶسكەلەڭ ۇرپاقتىڭ دەنٸ ساۋ بولۋى ٷشٸن جاسالىپ وتىر», — دەدٸ اقتٶبە قالاسىنداعى №56 مەكتەپتٸڭ ديرەكتورى گٷلنارا نارىمبەتوۆا.
مەكتەپتەردەگٸ ستوماتولوگييالىق كابينەتتەردٸڭ نەگٸزگٸ جۇمىسى — اۋرۋلاردىڭ الدىن الۋ جەنە ولاردى ەرتە كەزەڭدە انىقتاۋ. جىل سايىن وقۋشىلاردىڭ اۋىز قۋىسىنا جاپپاي تەكسەرۋ جٷرگٸزٸلٸپ, ونىڭ قورىتىندىسى بويىنشا قوسىمشا باقىلاۋدى نەمەسە ەمدٸ قاجەت ەتەتٸن بالالاردىڭ تٸزٸمٸ جاسالادى.
بالالاردىڭ بويىندا دۇرىس ەدەت قالىپتاستىرۋعا دا ەرەكشە كٶڭٸل بٶلٸنەدٸ. ستوماتولوگتار پروفيلاكتيكالىق ساباقتار ٶتكٸزٸپ, وقۋشىلارعا تٸستٸ دۇرىس تازالاۋ, ونى قانشالىقتى جيٸ تازالاۋ كەرەكتٸگٸن, سونداي-اق تٸس ششەتكاسى مەن پاستاسىن دۇرىس تاڭداۋ جولدارىن تٷسٸندٸرەدٸ.
كابينەتتەردە بالالار دەرٸگەر-ستوماتولوگتارى نەمەسە دانتيستەر جۇمىس ٸستەيدٸ. سونىمەن قاتار مەديتسينالىق مەيٸربيكەلەر پروتسەدۋرالاردى جٷرگٸزۋگە كٶمەكتەسٸپ, قۇرالداردى زارارسىزداندىرۋ جۇمىستارىن اتقارادى.
وسىلايشا, مەكتەپ ستوماتولوگيياسى وبلىستا كاريەس پەن باسقا دا اۋرۋلاردى ەرتە انىقتاۋدىڭ عانا ەمەس, سونىمەن قاتار اۋىز قۋىسىنا كٷتٸم جاساۋ مەدەنيەتٸن بالا كەزدەن قالىپتاستىرۋعا باعىتتالعان جٷيەلٸ پروفيلاكتيكالىق جۇمىستىڭ ماڭىزدى بٶلٸگٸنە اينالىپ كەلەدٸ.
