Aqtaý turǵyndary qalaǵa kelgen álemge áigili akter Djeki Channyń áleýmettik jelidegi paraqshasyna jappai pikir qaldyryp, óńirdegi kópten beri sheshilmei kele jatqan aýyz sý máselesine nazar aýdarýdy surady, dep habarlaidy ult.kz.
Jeli qoldanýshylarynyń biri akterge arnaǵan jazbasynda: «Qurmetti Djeki Chan! Aqtaý qalasyna qosh keldińiz! Sizdi dana ári qurmetti akter retinde bilemiz. Biraq bizdiń úide ár jaz saiyn aýyzsý bolmaidy. Bul másele jyldan-jylǵa qaitalanyp keledi. Bul – Aqtaý turǵyndary úshin úlken problema», – dep jazǵan.
Keibir turǵyndar halyqaralyq deńgeidegi juldyzdyń kómegimen jergilikti máselege nazar aýdartýǵa tyryssa, endi biri áleýmettik jeliler men óńirlik chattarda qala ákimdiginiń ótken jyly bergen ýádelerin eske salǵan.
Mańǵystaý oblysy ákiminiń orynbasary Anýar Týliakovtyń aitýynsha, óńirdegi sý tapshylyǵynyń negizgi sebebi – sý resýrsynyń azdyǵy emes, eskirgen sý qubyrlary. Onyń sózinshe, qazirgi ýaqytta tozyǵy jetken injenerlik jelilerdi kezeń-kezeńimen tolyq jańartý jumystary júrgizilip jatyr.
Aita keteiik, Aqtaýdaǵy aýyz sý máselesi sońǵy jyldary jaz mezgili bastalǵan saiyn qaita kóterilip, turǵyndardyń basty máseleleriniń birine ainalyp keledi.
