Jýrnalist, "Vlast" basylymynyń astanadaǵy shef-redaktory Tamara Vaal Parlamenttegi videoǵa qatysty túsinik berdi, - dep habarlaidy "Ult aqparat".
Ol osyndai keleńsiz oqiǵanyń sebepkeri bolǵanyna ókinetinin jáne eshkimdi renjitkisi kelmegenin, bul ýaqytta óz jumysyn atqaryp otyrǵanyn jazǵan.
"Dostar, aqparat salasynda eńbek etip júrgen maman retinde Parlamenttegi oqiǵadan taraǵan virýstyq beinejazbaǵa qatysty pikir bildirgenim durys dep oilaimyn.
Aldymen aitarym, Ánuran kezinde ornynan turmaý - jýrnalister jii jiberetin qatelik, óitkeni sol sáttegi jańalyqtardy tezirek baspasózge jetkizý kerek. Aqparat qyzmetkerleri - aqparatty sol sátte jáne tap qazir taratatyn jýrnalister. Al óz isimniń kásibi mamany retinde meniń de moinyma Parlament qabyrǵasynda bolyp jatqan mańyzdy jaittardy halyqqa barynsha tez ári ashyq jetkizý júktelgen.
Bizdiń jumysymyzdyń ereksheligi de osynda, biz naqty ýaqytta bolyp jatqan barlyq nárseni mátin túrinde berýimiz tiis. Memlekettik Ánuran oryndalyp jatqanda operatorlar men fotograftar zaldy aralap, túsirip jatqany siiaqty sharýa bul. Muny osy saladaǵy kez kelgen maman men aitpai-aq bilýi kerek. Biraq bul meniń óz elimdi, memlekettik rámizderimdi súimeimin, qurmettemeimin degendi bildirmeidi. Men - Qazaqstan Respýblikasynyń azamatymyn, balalarym da - Qazaqstan Respýblikasynyń azamattary.
Búgin keibireýler Tamara Vaal degenniń kim ekenin durys tanymaǵan siiaqty. Men - 18 jyldyq tájiribem bar jýrnalistpin, kóbinese táýelsiz BAQ-ta jumys istedim. Jemqorlyq, halyqtyń ózekti máselesi týraly jazyp júrmin, ras, bilikti kóp synaimyn. Men árqashan óz jumysymdy adal oryndadym jáne oryndai da beremin. Kez kelgen oryndy syndy qabyldaýǵa ázirmin, biraq dál búgingi maǵan degen óshpendilik janyma batyp tur. Men - óz elimniń azamatymyn, jemqor sheneýnikterdi, el turǵyndarynyń ortaq problemalaryn, kópshiliktiń talap-tilegi týraly jazatyn jýrnalispin. Dál osyndai ózekti máseleler bárimizdi biriktirýi kerek degen oidamyn" - dep jazdy ol Instagram paraqshasynda.
Sondai-aq ol jaǵdaiyna túsinistik tanytqan barsha dostaryna, áriptesterine, janashyr jandarǵa qoldaý kórsetkenderi úshin alǵys bildirgen.
