Jekelegen salalarda mindetti vaktsina saldyrý qajet bolady. Bul týraly Memleket basshysy Qasym-Jomart Toqaev aitty, dep habarlaidy "Ult aqparat".
«Qazir buqaralyq aqparat quraldarynda ekpe salýǵa qatysty jalǵan qujattar týraly derekter paida bolyp jatyr. Bul qoǵam úshin óte qaýipti jaǵdai. Óitkeni, halyq kóp jinalatyn jerlerde dert juqtyrǵan adam da júrýi múmkin degen sóz. Sondyqtan quqyq qorǵaý organdary osy máselege basa nazar aýdarýǵa tiis. Biz pandemiiamen kúrestiń negizgi joly vaktsinatsiia ekenin túsinýimiz qajet. Bul aiqyn nárse»,- dedi QR Prezidenti Úkimettiń keńeitilgen otyrysy barysynda.
Memleket basshysy Úkimet elimizdegi vaktsinatsiia boiynsha qazirgi kórsetkishterdi baiandaǵanyn eske salyp ótti.
«Alaida ashyǵyn aitý kerek, bul jumystyń qarqyny áli de mardymsyz. Naqty qadamdar jasaý qajet. Túptep kelgende azamattarymyz ózderiniń jáne jaqyn týystarynyń densaýlyǵyn oilap, sanaly túrde sheshim qabyldaýy kerek. Antivakserlerdiń qaýeset, dańǵaza áńgimelerine senýdiń qajeti joq. Sondyqtan biz ekpe salý naýqanyn jalǵastyramyz. Al, keibir jekelegen salalarda mindetti túrde vaktsina saldyrý qajet bolady. Bul úshin zańnamalyq ta, konstitýtsiialyq ta negiz bar. Týrasyn aitsaq, bul – árkimniń óz otandastary aldyndaǵy mindeti, paryzy», - dedi Qasym-Jomart Toqaev.
