Sybailas jemqorlyqqa qarsy qyzmet Talǵat Ardan men Qanat Sultanbekov Interpol tiziminde joq ekeni týraly BAQ-taǵy aqparatqa qatysty jaýap berdi, - dep habarlaidy Tengrinews.kz agenttigi.
"Astana qalasy ákimdiginiń laýazymdy tulǵalaryna jáne LRT, BRT/ITS jobalaryn iske asyrýǵa bólingen aqsha qarajatyn jymqyrý deregi boiynsha ózge de tulǵalarǵa qatysty qylmystyq is aiasynda Talǵat Ardanǵa jáne Qanat Sultanbekovke "qyzyl biýlleten" boiynsha (qamaýǵa alý jáne ekstraditsiialaý maqsatynda) halyqaralyq izdeý jariialandy. Júrgizilgen is-sharalar Ardannyń Túrkiiada ekenin anyqtady. Sot ony qamaýǵa alý úshin syrttai sanktsiia berdi. Osy memlekettiń quqyq qorǵaý organdary onyń ornalasqan jerin anyqtaý jáne ustaý boiynsha is-sharalar júrgizip jatyr.
Sonymen qatar, Qanat Sultanbekovtiń AQSh aýmaǵynda ekeni anyqtaldy. Ony ustaý jáne ekstraditsiialaý týraly ótinishter birneshe ret joldandy. Alaida, AQSh zańy boiynsha eger ol kóshi-qon rejimin buzbasa, "qyzyl biýlletenniń" bolýy izdeýde júrgen adamdy ustaýǵa negiz bolmaidy", - delingen habarlamada
Vedomstvo ókili kúdiktini ekstraditsiialaý qylmyskerlerdi ustap berý týraly ekijaqty kelisimniń bolmaýyna bailanysty qiyndap ketkenin aitty. Bul máseleni ýákiletti organ pysyqtaidy.
Sondai-aq, izdestirilip jatqan Sultanbekov pen Ardannyń jariia saitta bolmaýy týraly da aityldy.
"Halyqaralyq qylmystyq politsiia uiymy – Interpoldyń talaptary men erejelerine sáikes Interpoldyń jariia veb-saitynda qylmyskerdi izdestirý jáne olardy jariialaý týraly málimetter zor qoǵamdyq rezonans týdyrǵan, sondai-aq qoǵamǵa joǵary qaýip tóndiretin (adam óltirý, terrorizm, ekstremizm jáne t.b.) qylmystar jasaǵan adamdarǵa qatysty jariialanatynyn atap ótken jón. Dál osy talaptar izdestiriletin adamdardy bárine qoljetimdi tizimge qosýǵa negiz bolady. Jariia veb-saitta málimetterdi jariialaý týraly túpkilikti sheshimdi Interpoldyń bas hatshylyǵy (Lion, Frantsiia) qabyldaidy", - delingen habarlamada.
Buǵan deiin sybailas jemqorlyqqa qarsy is-qimyl agenttiginiń tóraǵasy "Astana LRT" kompaniiasynyń burynǵy basshysy Talǵat Ardan men Nur-Sultan (Astana) ákiminiń burynǵy orynbasary Qanat Sultanbekovti izdestirýge qatysty suraqqa jaýap bergen edi.
