Jańa jyl merekesi qarsańynda sybailas jemqorlyqqa qarsy qyzmet memlekettik qyzmetshilerge «syilyq» almaý kerektigin eskertti, dep habarlaidy QazAqparat.
Sybailas jemqorlyqqa qarsy is-qimyl agenttiginiń Nur-Sultan qalalyq departamenti memlekettik qyzmetshilerge merekeler qarsańynda múliktik nemese múliktik emes paida alý maqsatynda «syilyqtar» alǵandary úshin ákimshilik jáne qylmystyq jaýapkershilikke tartylatynyn eskertti.
Vedomstvo málimetinshe, QR Qylmystyq kodeksiniń 367-babyna sáikes 2 AEK-ten asatyn somadaǵy syilyq para bolyp esepteledi jáne qylmystyq jaýapkershilik sharalaryn qoldanýǵa ákep soǵady.
Al ózge jaǵdailarda (eger syilyqtyń quny tómen bolsa) Ákimshilik quqyq buzý kodeksiniń 676 jáne 678-baptaryna sáikes memlekettik fýnktsiialardy oryndaýǵa ýákilettik berilgen adamdarǵa nemese olarǵa teńestirilgen adamdarǵa berilgen zańsyz materialdyq syiaqy ákimshilik jaýapkershilikke sebep bolady.
Sonymen qatar departament sybailas jemqorlyq quqyq buzýshylyq faktisi týraly habarlaǵan nemese sybailas jemqorlyqqa qarsy is-qimylda ózge de jolmen járdemdesetin adamdardy kótermeleý úshin biri birjolǵy aqshalai syiaqy beriletindigin atap ótedi.
«Para nemese kelgen zalal somasy 1000 AEK (2 mln 917 myń teńge) aspaityn sybailas jemqorlyq týraly habarlama úshin syiaqy (qylmystyń aýyrlyǵyna bailanysty) 30-dan 100 AEK-ke deiin quraidy. Birjolǵy aqshalai syiaqy mynadai mólsherde belgilenedi: sybailas jemqorlyq quqyq buzýshylyqtar týraly ákimshilik ister boiynsha - 30 AEK; onsha aýyr emes sybailas jemqorlyq qylmystar týraly qylmystyq ister boiynsha - 40 AEK; aýyrlyǵy ortasha sybailas jemqorlyq qylmystar týraly qylmystyq ister boiynsha – 50 AEK; aýyr sybailas jemqorlyq qylmystar týraly qylmystyq ister boiynsha – 70 AEK; asa aýyr sybailas jemqorlyq qylmystar týraly qylmystyq ister boiynsha – 100 AEK», - dep atap ótedi vedomstvodan.
