Antaliianyń áýejaiynda tólqujatsyz qalyp qoiǵan 15 jastaǵy qazaqstandyq qyz búgin elge oraldy. Bul týraly qyzdyń anasy Asyl Nesipbaeva aityp berdi, dep habarlaidy QazAqparat.
Onyń aitýynsha, kámeletke tolmaǵan balany bóten elde qaldyryp ketken senimdi ókiline qatysty qylmystyq is qozǵalǵan.
«Qyzym Qazaqstanǵan jetti. Qazir ol úige kólikpen kele jatyr. Bizge QR Syrtqy ister ministrligi kómek kórsetti. Ol týristermen birge qonaq úide boldy», - dep túsindirdi jasóspirimniń anasy.
Onyń sózine qaraǵanda, Konsýldyq balanyń elimizge saparlaýy úshin anyqtama bergen. Osy qujat arqyly ol Qazaqstanǵa attandy.
«Bizdiń ministrlik ókilderi qyzymdy ushaqtyń bortyna deiin aparyp, mingizdi. Osy oraida Syrtqy ister ministrligi qyzmetkerleri balamnyń kimmen, qashan jáne qalai baratynyn tyńǵylyqty naqtylap berdi», - dedi A. Nesipbaeva.
Túrkiiada oqshaýlaýǵa jatqyzylǵan qyzdyń ákesi bul oqiǵanyń mán-jaiynan habardar eken. Sonymen qatar burynǵy kúieýiniń qazirgi zaiybymen Asyl Nesipbaeva bailanysqa shyqqan.
«Men ony áýejaida qarsy aldym. Ony jaýapqa tartýǵa qatysty politsiiaǵa shaǵym túsirdim. Saǵat 18:35 kezinde ol elge ushaqpen keldi. Sol jerden ony birden politsiiaǵa jetkizdi. Politsiia meni jábirlenýshi retinde tirkedi. Atalǵan oqiǵaǵa qatysty qylmystyq is qozǵaldy», - dedi balanyń anasy.
Onyń atap ótýinshe, qyzdyń ógei anasy bul jaǵdaida balanyń ózi tólqujatyn joǵaltyp alǵanyn aityp aqtalǵan.
«Biz Tomiristi (qyzdyń esimi) kútip otyrmyz. Odan osynyń mán-jaiyn tolyq surastyramyn», - dedi A. Nesipbaeva.
Budan buryn habarlanǵandai, jaqynda 15 jastaǵy qazaqstandyq qyzdy senimdi ókili Túrkiiadaǵy Antaliianyń áýejaiynda qaldyryp ketken.
Belgili bolǵandai, atalǵan senimdi ókil qyzdyń ákesimen azamattyq nekede eken. Olar Túrkiiadan Qazaqstanǵa attanar aldynda jetkinshektiń pasporty joǵalǵany anyqtaldy.
Óz kezeginde qyzdyń anasy Asyl bul oqiǵanyń mán-jaiyn aityp berdi.
«Meniń balam burynǵy kúieýimniń otbasymen Túrkiiada demalýǵa barǵan edi. Osy oraida senimhat burynǵy kúieýimniń zaiybyna jazylǵan edi, sebebi olar bir kún buryn (5-inen 6 tamyzǵa qaraǵan túni) saparlaýǵa tiis edi. Al qyzymnyń ákesi eki kúnnen keiin Túrkiiaǵa barmaqshy boldy. Sondyqtan senimhatty berip, bala aman-esen jetti. Al Qazaqstanǵa shyǵar kezde, elge orala almai qaldy. Saǵat 10:30 kezinde maǵan habarlasyp, áýejaida qalǵanyn aitty. Ógei anasy balanyń tólqujatyn joǵaltyp alǵan», - dedi qyzdyń anasy.
