Halyqaralyq jazǵy mektep aiasynda Túrkiianyń Antaliia provintsiiasynda júrgen Astana meditsinalyq ýniversitetiniń stýdentteri men oqytýshylary órtten zardap shekkenderge kómek kórsetken, dep habarlaidy "Ult aqparat".
Bul týraly Astana meditsinalyq ýniversitetiniń bastaýysh kásipodaq uiymynyń tóraǵasy Erjan Quspaev Facebook paraqshasynda jazdy.
«Túrkiianyń kýrorttyq qalalarynda, ásirese Antaliianyń mańynda orman órti órship tur, adam shyǵyny bar. Bul kúnderi biz Antaliiada boldyq. Antaliiaǵa Halyqaralyq jazǵy mektep aiasynda barǵan Astana meditsinalyq ýniversitetiniń barsha stýdentteri men oqytýshylary gýmanitarlyq kómek ortalyǵynyń jumysyna atsalysty. Olar qoldan kelgenshe kómek kórsetip, órtten zardap shekken turǵyndarǵa eldiń túkpir-túkipirinen aǵylyp jatqan azyq-túlik pen sýsyndardy kólikterden túsiristi. Gýmanitarlyq kómek tiegen KamAZ-dar bir saǵattyń ishinde bosap, qaita jolǵa shyǵyp jatty. Biz qaiyrymdylyq iske qatysyp, zardap shekkenderge qandai da bir kómek kórsete alǵanymyzǵa qýanyshtymyz», - dep jazdy ýniversitet ókili.
Túrkiiadaǵy tótenshe oqiǵaǵa qazaqstandyqtardyń qanshalyqty alańdap otyrǵanyn osy postyń astyna jazylyp jatqan pikirlerden kórýge bolady. Jeli qoldanýshylarynyń biri qazir sondaǵy ahýal qandai ekenin surasa, taǵy bir top qoldanýshylar syn saǵatta kómekke umtylǵan elgezek otandastaryna qoldaý bildirip, alǵys aitýda.
Eske salsaq, Túrik Respýblikasyndaǵy Tótenshe jáne Ókiletti Elshisi Abzal Saparbekuly Facebook-tegi paraqshasynda Antaliia provintsiiasyndaǵy alapat órtten zardap shekkender arasynda Qazaqstan azamattary joq ekenin jazǵan bolatyn.
Resmi málimet boiynsha 28 shildede tutanǵan orman órtinen 3 adam kóz jumǵan. Jalpy tilsiz jaýdan zardap shekken 122 adamnyń 58-i aýrýhanaǵa jetkizilgen.
