«Nur-Muqasan» tobynyń eks-solisi Muqasan Shahzadaev «Almaty áýenderi» mekemesiniń kórkemdik jetekshisi bolyp taǵaiyndaldy, dep habarlaidy "Ult aqparat".
Bul týraly óner iesiniń dosy ári áriptesi Meirambek Besbaev Instagram áleýmettik paraqshasynda jazdy.
"Almaty Áýenderiniń" sý jańa kórkemdik jetekshisi dosym - Muqasan Shahzadaev. Qazaq ánine 30 jyldan astam ýaqyt eńbegi sińgen, halyqtyń súiikti ulyna ainalǵan Muqash arý Almatynyń ónerin damytý isine zor ómirlik hám kásibi tájiribemen kirisip otyr. Muqasanǵa sáttilik tileiik, aǵaiyn!", - deidi ánshi.
Habardy Almaty qalalyq mádeniet basqarmasy da rastap otyr. «Ánshi Muqasan Shahzadaev «Almaty áýenderi» mekemesiniń kórkemdik jetekshisi bolyp taǵaiyndaldy», - dep málim etti olar.
Muqasan Shahzadaev - 1972 jyly 1 qańtarda Jambyl oblysy Talas aýdanynda týǵan. Tanymal estrada ánshisi. Qazaqstannyń eńbek sińirgen qairatkeri, Qazaqstan jastar odaǵy syilyǵynyń laýreaty.
1989 jyly Taraz mádeni ýchilishesin bitirgen. 1990 jyly Muhtar Áýezov atyndaǵy Ońtústik Qazaqstan memlekettik ýniversitetiniń (burynǵy Ál-Farabi atyndaǵy Shymkent pedagogikalyq mádeniet institýtynnyń) mýzyka fakýltetin támamdaǵan.
1990 jyly «Nur-Muqasan» dýetin quryp, sol topta 25 jyl óner kórsetti.
