Túrkiia astanasy Ankara qalasynda 16-shy halyqaralyq kitap kórmesi aiaqtaldy. Bul joly kórmege Qazaqstan «qonaq el» retinde qatysyp, oqyrmanǵa qazaq qalamgerleriniń shyǵarmalary tanystyryldy, dep habarlaidy QazAqparat.
Qazaqstannyń Túrkiiadaǵy Elshisi Abzal Saparbekulynyń aitýynsha, elimizdiń Ankara kitap kórmesine qatysýyndaǵy basty maqsat – túrik oqyrmanyna qazaq avtorlarynyń shyǵarmalaryn tanystyrý.
«Biyl Qazaqstan Táýelsizdiginiń 30 jyldyq mereitoiyn atap ótip jatyr. Osy oraida mundai keleli is-sharalar eki eldiń mádeni-ǵylymi bailanystaryn odan ári kúsheite túsetindigi sózsiz», - dedi Elshi.
2005 jyldan beri jylyna eki ret ótkiziletin Ankara kitap jármeńkesi aiasynda Qazaqstannyń Eńbek sińirgen qairatkeri, filologiia ǵylymdarynyń doktory, professor Ádil Ahmetovtiń «Kolýmb dáýirinen burynǵy amerikalyq «úndisterdiń» altailyq tegi», belgili jazýshy Kenan Koch pen Aiabek Bainiiazovtiń «Túrikshe-qazaqsha, qazaqsha-túrikshe sózdigi», Nurǵali Orazdyń túrikshege aýdarylǵan «Qazyǵurt oqiǵalary», Orhan Sóilemez, Aiabek Bainiiazov jáne Shapaǵat Jalmanovtyń «Aqyndardyń kózimen – dombyra», Baýyrjan Qaraǵyzulynyń «Kravat» óleńder jinaǵy, qazaqtyń uly aqyny Jambyl Jabaevtyń «Kóroǵly dastany», Málik Otarbaevtyń «Iýnýs Emre» jyrlary, jazýshy ǵalym Kýrshad Zorlýnyń «Nursultan Nazarbaev Uly dalanyń rýhani jańǵyrýy», «Aqyndardyń kózimen – Abai», Ábish Kekilbaevtyń túrikshege aýdarylǵan kitaby tanystyryldy.
Sondai-aq kórme aiasynda Qazaqstannyń Túrkiiadaǵy Elshiligi jáne Ankara Hadjy Bairam Veli ýniversitetiniń birlesip uiymdastyrýmen qazaq halyq poeziiasynyń áigili tulǵasy Jambyl Jabaevtyń 175 jyldyǵyna arnalǵan ǵylymi konferentsiia ótti. Táýelsizdigimizdiń 30 jyldyǵyna orailastyrylǵan konferentsiiany ashqan Elshi Abzal Saparbekuly Jambyldyń qazaq ádebieti men adamzat tarihyndaǵy orny erekshe ekendigine toqtaldy.
«Uly Dala Gomeri atanǵan Jambyl kózi tirisinde-aq álemge áigili bolyp, qurmetke bólendi. Óz ultynyń rýhani qazynasyn, Uly dalanyń tereń filosofiiasyn jyrlarynda kórsete bilgen Jambyl eski men jańany ushtastyra bilgen», - dedi ol.
Konferentsiiada túriktiń birneshe ǵalymy Jambyl ómiri men shyǵarmashylyǵy týraly baiandama jasady. Is-shara sońynda qatysýshylarǵa Qazaqstannyń Túrkiiadaǵy Elshiliginiń qoldaýymen basylyp shyǵarylǵan kitaptar tartý etildi.
Aita keteiik, buǵan deiin Italiia, Frantsiia, Iran jáne Resei bul kórmege «qonaq el» mártebesinde qatysqan bolatyn. Al bul joly Qazaqstan «qonaq el» retinde qatysyp jatqan 16-shy Ankara halyqaralyq kitap kórmesine 350 jazýshy, 174 baspa úii at basyn buryp, 100 myńnan astam kitap oqyrman nazaryna usynyldy. Sonymen qatar kórme aiasynda 43 jazýshymen kezdesý ótti.
